ހުޅުމާލޭ ހޮސްޕިޓަލާއި ޗައިނާގެ ޒޮންގްޝަން އޮޕްތަލްމިކް ސެންޓަރު ގުޅިގެން ކުރިއަށް ގެންދިޔަ ލޮލުގެ ހާއްސަ ކޭމްޕް ކާމިޔާބުކަމާއެކު ނިންމާލައިފި އެވެ.
މިމަހުގެ 7 ވަނަ ދުވަހުން ފެށިގެން 11 ވަނަ ދުވަހާއި ހަމަޔަށް ކުރިއަށް ގެންދިޔަ މި މެޑިކަލް ކޭމްޕްގައި ޖުމްލަ 571 ބަލިމީހުންނަށް ފަރުވާދީ އަދި 75 ސާޖަރީ ކޮށްފައިވާކަމަށް ކޭމްޕާއި ހަވާލާދެއްވައި ހުޅުމާލޭ ހޮސްޕިޓަލްގެ މީޑިޔާ އޮފިޝަލް ހުސެން ވަނީ ވިދާޅުވެފައެވެ.
މި ކޭމްޕްގައި ފަރުވާދެއްވާފައިވަނީ ޗައިނާގެ މެޑިކަލް ޓީމަކުންނެވެ. އަދި މި ކޭމްޕަށް އުއްމީދުކުރި ވަރަށްވުރެ ބޮޑު ތަރުހީބެއް ލިބިފައިވާކަމަށް މީޑިޔާ އޮފިޝަލް ވަނީ ވިދާޅުވެފައެވެ. އެގޮތުން މެޑިކަލް ކޭމްޕަށް ނަންނޯޓުކުރަން ހުޅުވާލި ތާރީހުގައި ގާތްގަޑަކަށް 700 އެއްހާ މީހުން ނަންނޯޓުކޮށްފައިވާކަމަށާއި، އެހެންނަމަވެސް ކޭމްޕް ކުރިއަށް ގެންދިޔަ މުއްދަތުގައި ފަރުވާދެވިފައިވަނީ 571 މީހުންނަށް ކަމަށް އޮފިޝަލް ވަނީ ވިދާޅުވެފައެވެ. އަދި ނަންނޯޓުކޮށް ކޭމްޕްގައި ބައިވެރިނުވެވޭ ފަރާތްތަކަށް ލޮލުގެ ހާއްސަ ކްލިނިކުން ފަރުވާ ލިބޭނެ އިންތިޒާމް ހަމަޖައްސައިދޭނޭ ކަމަށްވެސް އޮފިޝަލް ވަނީ ވިދާޅުވެފައެވެ.
ޗައިނާގެ ސަރުކާރުން ހުޅުމާލޭ ހޮސްޕިޓަލްގައި ޤާއިމްކުރި ލޮލުގެ ބަލިތަކަށް ހާއްސަ ސެންޓަރު މާދަމާގެ ވަގުތެއްގައި ހުޅުވާނޭކަމަށްވެސް މީޑިޔާ އޮފިޝަލް ވަނީ ވިދާޅުވެފައެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)