ރާއްޖެގައި ކޮވިޑް-19 އަށް ޕޮޒިޓިވްވި މީހުންގެ ތެރޭގައި ހިމެނޭ 6 ކުޑަކުއްޖަކު އިތުރު ފަރުވާއަށް އެޑްމިޓްކޮށްފައި އެބަތިބިކަމަށް އައިޖީއެމްއެޗްގެ ކުޑަކުދިންގެ ހާއްސަ ޑޮކްޓަރ، އަހުމަދު ފައިސަލް ވިދާޅުވެއްޖެ އެވެ.
ކޮވިޑަށް ޕޮޒިޓިވްވާ މީހުން މިފަހަކަށް އައިސް ރާއްޖޭގައި އިތުރުވެފައިވާއިރު މީގެތެރޭގައި ގިނަ އަދަދެއްގެ ކުޑަކުދިންވެސް ހިމެނެ އެވެ.
ޑރ. ފައިސަލް އިއްޔެ ކުރެއްވި ޓްވީޓެއްގައި ވިދާޅުވީ ކޮވިޑް ޖެހިގެން 6 ކުއްޖަކު އެޑްމިޓްކޮށްފައި ވާ ކަމަށެވެ. އޭގެތެރޭގައި މަންމަ ޕޮޒިޓިވްވެގެން އޮޕަރޭޝަން ކޮށްފައި ނަގަންޖެހުނު ތުއްތު ކުއްޖަކު ވެސް ވަނީ އެޑްމިޓްކޮށްފަ އެވެ.
އެހެންނަމަވެސް މި ހުރިހާ ކުދިންނާއި އަދި ޕޮޒިޓިވްވި މަންމަގެ ހާލުވެސް ރަނގަޅުކަމަށް ޑރ. ފައިސަލް ވަނީ ވިދާޅުވެފަ އެވެ.
ދުނިޔޭގައި އަދި މިހާތަނަށް 16 އަހަރުން ދަށުގެ ކުޑަކުދިންނަށް ރައްކާތެރިކަން ކަށަވަރުވާ ވެކްސިނެއް އުފައްދާފައެއް ނުވެއެވެ. އެހެންކަމުން ރާއްޖޭގައިވެސް މިވަގުތު ވެކްސިން ދިނުމަށް ނިންމާފައިވަނީ އުމުރުން 16 އަހަރުން މަތީގެ އެކި އުމުރުފުރާތަކުގެ މީހުންނަށެވެ. މި މީހުންގެ ތެރޭގައި ހިމެނޭ މާބަނޑު މީހުންވެސް އިސްތިސްނާ ވެއެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)