ކުރިއާ ހިލާފަށް ކޮވިޑް-19 ޖެހިގެން ކުއްލިއަކަށް ހާލު ބޮޑުވާ މީހުން ގިނަ ކަމަށް ކްލިނިކަލް އެޑްވައިޒަރީ ޓީމުގެ ޑރ. މޫސާ މުރާދު ވިދާޅުވެއްޖެއެވެ.
ހެލްތު އިމަޖެންސީ އޮޕަރޭޝަންސް ސެންޓަރު (އެޗްއީއޯސީ)ގައި ރޭ ބޭއްވި ނޫސްވެރިންގެ ބައްދަލުވުމުގައި ޑރ. މުރާދު ވަނީ މިހާރު ގިނައިން އެޑްމިޓްކުރަން ޖެހެނީ މެދު އުމުރުގެ މީހުން ކަމަށްވެސް ވިދާޅުވެފަ އެވެ. އަދި ގިނަ އަދަދެއްގެ މެދު އުމުރުގެ މީހުން އެޑްމިޓްކުރަން ޖެހުމަކީ ސިއްހީ އެހީތެރިންގެ ނަޒަރުން ވިސްނާއިރު ވަރަށް ކަންބޮޑުވާ ކަންތައްތަކެއް ކަމަށާއި އެ އަދަދުތައް ވެސް ކުޑަކުރެވޭނީ ޖުމުލަ ޕޮޒިޓިވްވާ އަދަދުވެސް ކުޑަކުރެވިގެން ކަމަށް ވިދާޅުވެފަ އެވެ.
ޑރ. މުރާދު އިތުރަށް ވިދާޅުވީ ފާހަގަކުރެވޭ އެހާ ބޮޑެތި އަލާމާތްތަކެއް ފެންނަން ނެތް ކަމުގައިވިޔަސް ކުއްލިއަކަށް ހާލު ދެރަވާ މީހުން ވަރަށް ބޮޑަށް ފާހަގަކުރެވޭ ކަމަށެވެ.
ހަމައެހެންމެ އެޑްމިޓްކުރަން ޖެހޭ މީހުން ގިނަވެގެން ދިއުމަކީ ސިއްހީ އެހީތެރިންނަށް ގިނަ އުނދަގޫތަކަކާ ކުރިމަތިލާން ޖެހޭނެ ކަމެއް ކަމަށާއި އެޑްމިޓްކުރަން ޖެހޭ އަދަދާ ބަލާއިރު ސިއްހީ އެހީތެރިންނެއް ނެތްކަމަށް ޑރ. މުރާދުވަނީ ވިދާޅުވެފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)