ދޮޅު އަހަރަށް ފަހު ރާއްޖޭގައި ހިމަބިހި ފެނިއްޖެކަމަށް ކުޑަކުދިންގެ ޑޮކްޓަރު އަހްމަދު ފައިސަލް ވިދާޅުވެއްޖެއެވެ.
ޑރ. ފައިސަލް ކުރެއްވި ޓްވީޓެއްގައި މިއަހަރު ރާއްޖޭގައި ހިމަބިހި ފެނިއްޖެކަން ކަށަވަރުކޮށްދެއްވިއެވެ. އަދި ދަރިފުޅުގެ ވެކްސިން ކާޑު ޗެކް ކޮށް ހުރިހާ ވެކްސިންތައް ހަމަކުރުމަށް ޑރ. ފައިސަލް އިލްތިމާސް ކުރެއްވި އެވެ.
ހިމަބިހި ކޮންޓްރޯލް ކުރެވޭނެ ހަމައެކަނި ގޮތަކީ މީސަލްސް، އެމް.އެމް.އާރް އަދި އެމް.އާރް މިއިން ކޮންމެ ވެކްސިންއެއްގެ 2 ޑޯޒް ހަމަކުރުން ކަމުގައި ޑރ. ފައިސަލް ވިދާޅުވިއެވެ.
ދޮޅު އަހަރަށްފަހު ރާއްޖޭންވެސް ހިމަބިހި ފެނިއްޖެ
— Ahmed Faisal (@Faisalnaifaru) January 9, 2020
ދަރިފުޅުގެ ވެކްސިން ކާޑު ޗެކް ކުރަށްވާ
ހަނދާންނެތިގެންވެސް ނުޖެހި ހުރި ވެކްސިންތައް ހަމަކުރައްވާ!
ވެކްސިން ނުޖަހާ ހުއްޓާ އޭގެން ރައްކާތެރިކޮށްދޭ ބައްޔެއް ޖެހިއްޖެނަމަ އެ ކޮންޓުރޯލްކުރެވޭނޭގޮތްތައް ރާއްޖޭގައިވެސް މަދުވާނެ#measles https://t.co/ZOIQfovBKl
މީގެއިތުރުން ހިމަބިހި ޖެހިފައިވާ މީހަކު ތަނެއްގައި މަޑުކޮށްލައިގެން އިނދެފައި ދިޔަޔަސް 1 ގަޑިއިރުވަންދެން އެވައިރަސް އެތަނެއްގައި ހުންނަކަމާއި، އެތަނަކަށް އަންނަ އެހެން މީހުންނަށް އެބަލި ޖެހުމުގެ ފުރުސަތުއޮތް ކަމަށް ޑރ. ފައިސަލް ފާހަގަ ކުރެއްވިއެވެ.
ހިމަބިއްސަކީ އެ ބަލިޖެހިފައިވާ މީހެއް ކެއްސާއިރު ނުވަތަ އަޅާ ކިބިހީގެ ޒަރިއްޔާއިން ފެތުރޭ ނުރައްކާތެރި ވައިރަސް އެކެވެ. އަދި މި ވައިރަސް ވައިގެ ތެރޭގައި ދެ ގަޑިއިރު ވަންދެން ހުންނަ ކަމަށް ސިއްހީ މާހިރުން ވަނީ ބުނެފަ އެވެ.
ހިމަބިހީގެ އަލާމާތްތަކުގެ ތެރޭގައި ގަދަޔަށް ހުންއައުމާއި، ކެއްސުން، ނޭފަތުން އަރިދަފުސް އައުން، ލޯ ރަތްވުން، އަދި ރަތް ކުދި ބިހި ގައިން ނެގުން ފަދަ އަލާމާތްތައް ހިމެނެ އެވެ.
މިކަމާއި ބެހޭގޮތުން އެޗްޕީއޭ އިން ބުނީ ހިމަބިހި އަށް ޝައްކުވާ ފަރާތެއް ފެނުމުން، ބަލި ހުރިތޯ ޔަޤީން ކުރުމުގެ މަސައްކަތް ކުރިއަށް ދާކަމަށެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)