ރާއްޖެއިން ރުބެއްލާ އާއި ހިމަބިހި ނައްތާލެވިއްޖެކަމަށް ކަނޑައަޅައިފި
ރާއްޖެއަކީ ރުބެއްލާ އާއި ހިމަބިހި ނައްތާލެވިފައިވާ ޤައުމެއްގެ ގޮތުގައި ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ކަނޑައަޅައިފި އެވެ.
މިއަދު އެކަން ޔަގީންކޮށްދީ ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކުރި ޓްވީޓްގައި ވަނީ ރާއްޖެއިން ރުބެއްލާ އާއި ހިމަބިހި ނައްތާލެވިފައިވާކަން ރަސްމީކޮށް ދުނިޔޭގެ ސިއްހަތު ޖަމިއްޔާއިން އިއުލާންކޮށްފައިވާކަމަށް ބުނެފަ އެވެ.
ރާއްޖެއިން މި ދެބަލި ނައްތާލެވިފައިވާކަން އިއުލާންކޮށްފައިވަނީ 2023 ޑަބްލިޔުއެޗްއޯގެ ސައުތު-އީސްޓް އޭޝިއާ ރީޖަނަލް ވެރިފިކޭޝަން ކޮމިޝަން ފޯ މީސެލްސް އެންޑް ރުބެއްލާ އެލިމިނޭޝަނުން ބޭއްވި އޮންލައިން ބައްދަލުވުމެއްގަ އެވެ.
Congratulations Maldives & Sri Lanka for eliminating Measles and Rubella!
— WHO South-East Asia (@WHOSEARO) July 8, 2020
They are the first two countries in @WHO South-East Asia Region to eliminate these childhood killer & debilitating diseases ahead of 2023 target. @WHOSriLanka @WHOMaldives https://t.co/p2anfPn6RY pic.twitter.com/YVq4uKiMuP
ޖުމްލަ 11 އެޕިޑެމިއޮލޮޖީ އާއި ވައިރޮލޮޖީ އާއި އާންމު ސިއްހަތާއި ބެހޭ މާހިރުން ހިމެނޭ މި ކޮމިޝަނުން މި ދެބަލި ނައްތާލެވިފައިވާކަން އިއުލާންކޮށްފައި މިވަނީ އެ ގައުމެއްގެ މުޖުތަމައު ތެރޭގައި ބަލި އުޅޭތޯ ރަނގަޅަށް މޮނިޓާކޮށް، ބަލި އާއްމުކޮށް ނުފެތުރޭތާ ތިން އަހަރު ވުމުންނެވެ.
ރާއްޖެއާއި ލަންކާއިން ހިމަބިހި ނައްތާލެވުނުކަން އިއުލާންކޮށް މަރުހަބާ ދަންނަވަމުން ޑަބްލިޔުއެޗްއޯ ސައުތު އޭޝިޔާ ރީޖަންގެ ރީޖަނަލް ޑިރެކްޓަރ ހެތްރަޕަލް ސިންހް ވިދާޅުވީ އެންމެންގެ ސިއްހަތާއި އާބާދީގެ ދުޅަހެޔޮ ކަމަށްޓަކައި މި ނުރައްކާތެރި ބަލިތަކުން ހުރިހާ ކުޑަކުދިން ރައްކާތެރި ކުރުމަކީ ވަރަށް މުހިއްމު ފިޔަވަޅެއް ކަމަށެވެ.
ޑަބްލިޔުއެޗްއޯގެ މިނިންމުމާއި ގުޅިގެން ޑރ. ފާތިމަތު ނަޒްލާ ރަފީޤް ވިދާޅުވެފައިވަނީ، މީގެން ދޭހަވަނީ މުޖުތަމައުގައި އާއްމު ސިއްހަތުގެ ދައުރު ބޮޑުކަމެވެ. އަދި ވަކިން ހާއްސަކޮށް ވެކްސިން ދިނުމުގެ މުހިންމުކަން އޭނާ ފާހަގަކުރެއްވިއެވެ.
ރާއްޖެއިން 2018 ވަނަ އަހަރު ހިމަބިހި ނައްތާލެވުނު ފަހުން އަނެއްކާވެސް މިދިޔަ އަހަރުގެ ފަހުކޮޅު ވަނީ ހިމަބިހީގެ ކޭސްތަކެއް ފެނިފައެވެ. އެހެންނަމަވެސް އޭގެފަހުން ހިމަބިހީގެ ކޭސްއެއް ނުފެނި ވަނީ ގިނަ ދުވަސްތަކެއް ވެފައެވެ.
އެންމެފަހުން ރާއްޖެއިން ރުބެއްލާގެ ކޭސްއެއް ފެނިފައިވަނީ 2015 ވަނަ އަހަރުގެ ތެރޭގައެވެ. އޭގެފަހުން މިހާތަނަށް އަދި ރުބެއްލާގެ އެއްވެސް ކޭސްއެއް ރާޢްޖެއިން ފެނިފައެއް ނުވެއެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)