ޗައިނާ ސަރުކާރުގެ އެހީގައި ހުޅުމާލޭ ހޮސްޕިޓަލްގައި ލޮލުގެ ބަލިތަކަށް ފަރުވާދޭ ސެންޓަރެއް ހުޅުވުމަށް ހަމަޖެހިފައިވާކަމަށް އެ ހޮސްޕިޓަލުން ބުނެފި އެވެ.
މިކަމާއި ގުޅިގެން ހުޅުމާލޭ ހޮސްޕިޓަލުން ހޮނިހިރު ދުވަހު ނެރުނު ނޫސް ބަޔާނުގައި ބުނެފައިވާގޮތުގައި މި ސެންޓަރު އަންނަ އަހަރުގެ ޖެނުއަރީމަހުގެ ކުރީކޮޅުގައި އެ ހޮސްޕިޓަލްގައި ހުޅުވާނެއެވެ. އަދި ސެންޓަރު ހުޅުވުމުގެ ގޮތުން ލޮލުގެ ބަލިތަކަށް ހާއްސަކޮށްގެން ކޭމްޕެއް ކުރިއަށް ގެންދިއުމަށް ހަމަޖެހިފައިވާ ކަމަށްވެސް އެ ހޮސްޕިޓަލުން ވަނީ ބުނެފައެވެ.
މި ކޭމްޕަކީ ޗައިނާގެ މެޑިކަލް ޓީމަކާއި އަދި ހުޅުމާލޭ ހޮސްޕިޓަލާއި ކުރިއަށް ގެންދިއުމަށް ހަމަޖެހިފައިވާ ކޭމްޕެކެވެ. ހުޅުމާލޭ ހޮސްޕިޓަލުން މައުލޫމާތު ދޭ ގޮތުގައި މި ކޭމްޕްގައި ނަމްބަރު އައިނު ނަގައިދިނުމުގެ އިތުރުން ލޮލުގެ ތަފާތު ބަލިތައް ކަމަށްވާ ލޯ ފުސްވުން، ގުލްކޯމާ އަދި ހަކުރުބަލީގެ ސަބަބުން ލިބޭ ގެއްލުންތަކަށްވެސް ފަރުވާ ދޭނެއެވެ.
މި ކޭމްޕުގައި ފަރުވާދިނުމަށްޓަކައި މިހާރުވެސް ބަލިމީހުން ސްކްރީން ކުރަމުން އަންނަކަމަށް އެ ހޮސްޕިޓަލުން ވަނީ ބުނެފަ އެވެ. އަދި ސްކްރީން ކުރުމަށް އެ ހޮސްޕިޓަލްގެ ހޮޓްލައިން 1417އަށް ގުޅައިގެން އެޕޮއިންޓްމަންޓް ހެދުމަށް އެ ހޮސްޕިޓަލުން ވަނީ އެދިފައެވެ.
މީގެއިތުރުން ލޮލުގެ ބަލިތަކަށް ފަރުވާދޭ މި ސެންޓަރު ޤާއިމްކުރުމަށްފަހު، ޗައިނާގެ މެޑިކަލް ޓީމެއް ސެންޓަރުގައި ފަރުވާދިނުމަށް ހަރަކާތްތެރިވާނޭ ކަމަށް އެ ހޮސްޕިޓަލުން ވަނީ ބުނެފައެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)