2019 ވަނަ އަހަރުގެ ޖަނަވަރީ މަހުން އޮކްޓޯބަރ މަހާއި ހަމައަށް އެޗް.ޕީ.އޭގެ ތަފާސް ހިސާބުތަކުން ދައްކާ ގޮތުގައި ޑެންގީ ހުމުގެ 4420 ކޭސް އަދި ޗިކުންގުންޔާގެ 1460 ކޭސްއެއް ވަނީ ރިޕޯޓު ކުރެވިފައެވެ. މިކަން ފާހަގަކޮށްފައިވަނީ އެޗް.ޕީ.އޭ އިން މިއަދު ނެރުނު ޑެންގީ އާއި ޗިކުންގުންޔާގެ ހަފްތާ ރިޕޯޓު ގައެވެ.

ސެޕްޓެމްބަރ މަހާއި އޮކްޓޯބަރ މަހު ޑެންގީ ހުން ޖެހިގެން އެންމެ ގިނައިން ރިޕޯޓުކޮށްފައިވަނީ ށ. ނ. ޅ. އަތޮޅުން އަދި މާލެ އާއި ހުޅުމާލެއިންނެވެ. އެއީ ށ. އަތޮޅުން 54 ކޭސް، ނ. އަތޮޅުން 66 ކޭސް، ޅ. އަތޮޅުން 69 ކޭސް، އަދި މާލެ އާއި ހުޅުމާލެ އިން 130 ކޭސް އެވެ. މީގެ އިތުރުން މި ދެމަހު އެންމެ މަދުން ރިޕޯޓުކުރެވިފައިވަނީ ފ. އަދި ވ. އަތޮޅުންނެވެ.

ސެޕްޓެމްބަރ މަހާއި އޮކްޓޯބަރ މަހު ޗިކުންގުންޔާ ޖެހިގެން އެންމެ ގިނައިން ރިޕޯރޓްކޮށްފައިވަނީ ރ. ގއ. އަތޮޅުންނާއި މާލެ އިންނެވެ. އެއީ ރ. އަތޮޅުން 333 ކޭސް، ގއ. އަތޮޅުން 291 ކޭސް އަދި މާލެއިން 393 ކޭސް އެވެ. މިދެމަހު އެންމެ މަދުން ރިޕޯޓުކުރެވިފައިވަނީ ލ. އަތޮޅުންނެވެ.

އެޗް.ޕީ.އޭގެ ހަފްތާ ރިޕޯޓުން އިތުރަށް ދައްކާ ގޮތުގައި ފާއިތުވި 3 އަހަރާއި އަޅާބަލާއިރު މިއަހަރުގެ މިހާތަނަށް ޑެންގީ ހުން ރިޕޯޓުކުރެވިފައިވާ މިންވަރު ވަނީ އިތުރުވެފައެވެ. 

ޑެންގީ ހުމާއި ޗިކުންގުންޔާ އަކީ އޭޑީޒް މަދިރީގެ ޒަރިއްޔާއިން ޖެހޭ ދެ ބައްޔެވެ. ގަދައަށް ހުން އައުން، ބޮލުގަ ރިއްސުން، ހުޅު ހުޅުގައި ރިއްސުން އަދި ވަރުބަލިވުމަކީ މިބަލި ޖެހިފައިވާ މީހެއްގެ ފަރާތުން ފެންނާނެ ނިޝާންތަކެކެވެ. މިފަދަ ކަމެއް ފާހަގަ ވެއްޖެނަމަ ލަސްނުކޮށް ޑޮކްޓަރަށް ދެއްކުމަކީ މުހިއްމު ކަމެކެވެ.

މަދިރި އާލާވާ ތަންތަން ނައްތާލާ މުޖްތަމަޢު ހޭލުންތެރި ކުރުމުގެ ގޮތުން ޑޮކްޓަރުންނާއި، ސިއްޙީ ތަޖުރިބާކާރުން، ރަށްރަށުގެ ސިއްޙީ މަރުކަޒުތައް އަދި ހޮސްޕިޓަލްތަކުން ދަނީ ބޮޑެތި މަސައްކަތްތަކެއް ކުރަމުންނެވެ. އެގޮތުން ފާހަގަކޮށްލެވެނީ މިދިޔަ ހަފްތާގައި ރ. ދުވާފަރުގެ ސިއްހީ މަރުކަޒު އިސްނަގައިގެން އެރަށުގައި މަދިރި ކޮންޓްރޯލް ކުރުމުގެ ޕްރޮގްރާމެއް ފަށައިފާވާ ކަމެވެ (އިތުރަށް ކިޔާ).

ގުޅުންހުރި ލިޔުންތައް

ފަހުގެ ލިޔުންތައް