އަންނަ ހޯމަ ދުވަހު ދިވެހިރާއްޖޭގެ ހެލްތު މިނިސްޓްރީ އިން ބާއްވާ ހެލްތު ކޮންފެރެންސެއް ޕެރަޑައިސް އައިލެންޑް ރިސޯޓުގައި އޮންނާނެއެވެ.
"ނެޝަނަލް ކޮންފަރެންސް އޮން ރީވަޓަލައިޒިންގ ޕަބްލިކް ހެލްތު: ވޯކިންގ ޓުގެދަރ ފޯރ އަ ހެލްދިއަރ ނޭޝަން" ނަމަކަށް ކިޔާ މިކޮންފަރެންސްގެ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި މިނިސްޓްރީ އިން ވިދާޅުވީ، މި ކޮންފަރެންސަކީ ސަރުކާރުގެ ކުރިއަށް އޮތް 5 އަހަރު ދުވަހުގެ ސްޓްރެޓަޖިކް އެކްޝަން ޕްލޭން (ސެޕް) ތަންފީޒް ކުރުމަށްޓަކާ ގައުމީ ފެންވަރުގެ ޕްލެޓްފޯމެއްގައި ގުޅުންހުރި ދާއިރާތައް ހިމެނޭގޮތަށް މަޝްވަރާކުރުމަށް ބާއްވާ ކޮންފަރެންސެއް ކަމަށެވެ.
މިނިސްޓްރީ އޮފް ހެލްތު އިން މި ކޮންފަރެންސް ބާއްވަނީ ދުނިޔޭގެ ސިއްޙަތު ޖަމިއްޔާ އާއި ގުޅިގެންނެވެ.
މި ކޮންފަރެންސްގެ މައިގަޑު މަގްސަދުތަކުގެ ތެރޭގައި އާބާދީއަށް އަންނަ ބަދަލުތަކާއި އެކު އާބާދީގެ ސިއްޙީ މައްސަލަތައް ހައްލު ކުރުމަށް ގައުމީ ސިޔާސަތު ރާވާ ފަރާތްތަކާއި ދާއިރާގެ ނިންމުންތައް ނިންމާ ފަރާތްތަކަށް މައުލޫމާތުދީ އަހުލުވެރިކުރުވުން ހިމެނެއެވެ. އަދި ސިއްޙީ ގޮތުން ދުޅަހެޔޮ ދިރިއުޅުމަކަށް މަގުފަހިކުރުމަށް އެންމެން އެއްކޮށް މަސައްކަތް ކުރުމުގެ މުހިއްމުކަމާއި އަދި މިގޮތަށް މަސައްކަތް ކުރުމުން އަންނާނެ ރަގަޅު ބަދަލާއި ބެހޭގޮތުން މައުލޫމާތު ހިއްސާކުރުން ހިމެނެއެވެ.
އަދި މީގެއިތުރުން ދާއިރާގެ މުހިއްމު ކަންތައްތައް ސްޓްރެޓެޖިކް ޕާތުވޭއެއްގެ ތެރެއިން ހާސިލް ކުރާނެ ގޮތާއި ބެހޭގޮތުން މަޝްވަރާ ކުރެވިގެންދާނެއެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)