ނުރައްކާތެރި ކޮރޯނާވައިރަސް ޖެހިގެން ޗައިނާއިން އިއްޔެ އެކަނިވެސް 242 މިހުން މަރުވެއްޖެ އެވެ.

ޗައިނާގެ ސިއްޙީ އޮފިޝަލުން ބުނާގޮތުގައި މި 242 މީހުން މަރުވެފައިވަނީ ޗައިނާގެ ހުބޭއީ އަވަށުންނެވެ. ހުބޭއީ އަކީ މިހާރު ޗައިނާގައި އެންމެ ބޮޑަށް ކޮރޯނާވައިރަސް ފެތުރިފައިވާ އަވަށްވެސް މެއެވެ.

ކޮރޯނާވައިރަސް ޖެހިގެން މިހާތަނަށް މަރުވި މީހުންގެ އަދަދުވަނީ 1،310އަށް އަރާފައެވެ. އެހެންނަމަވެސް މިއަހަރުގެ އޭޕްރީލްގެ ފަހުކޮޅަށް ކޮރޯނާވައިރަސް ކޮންޓްރޯލް ކުރެވޭނޭ ކަމަށްވެސް ޗައިނާގެ ސިއްހީ އޮފިޝަލުންވަނީ ލަފާކޮށްފަ އެވެ. 

ސިއްހީ އޮފިޝަލުން އިތުރަށް ބުނެފައިވާ ގޮތުގައި އިއްޔެ އެކަނިވެސް ޗައިނާއިން 14،840 މީހުންވަނީ ކޮވިޑް-19އަށް ޕޮޒިޓިވް ވެފަ އެވެ. އަދި އޭގެތެރެއިން 2،015 މީހުންނަކީ ހުބޭއީ އަވަށުން މި ވައިރަހަށް ޕޮޒިޓިވްވި މީހުންނެވެ. 

ހުބޭއީ އަވަށަކީ ކޮވިޑް-19 ގެ ނަންދީފައިވާ ކޮރޯނާވައިރަސް އެންމެ ފުރަތަމަ ފެނުނު ޗައިނާގެ ވޫހާން ސިޓީގައި އޮންނަ އަވަށެކެވެ. ސިއްހީ އޮފިޝަލުން ބުނިގޮތުގައި މިހާރު ފެތުރެމުންދާ އިންފެކްޝަން އާއި ގުޅިގެން އެމީހުން މިހާރުވަނީ އައު މެތޮޑްތަކެއް ބޭނުންކުރަންފަށާފަ އެވެ. އެހެންނަމަވެސް މަރުވާ މީހުންގެ އަދަދު މަތިވާންފެށުމުން މި މެތޮޑްތަކުގެ ބޭނުންކުރެވޭ ކަމާމެދު މީހުން ދަނީ ސުވާލުއުފައްދަމުންނެވެ. 

ކޮރޯނާވައިރަސް އައުޓްބްރޭކް އާއި ގުޅިގެން ވޫހާން ސިޓީގެ ގިނަ އިސްވެރިންތަކެއް ވަނީ މަގާމުން ދުރުކޮށްފަ އެވެ. އަދި ވޫހާން ސިޓީގެ ސީފުޑް މާރުކޭޓު ރަނގަޅަށް ޗެކްނުކުރާ ކަމުގެ ތުހުމަތުގައި އެ އަވަށުގެ އާދައިގެ ގިނަ ސިއްހީ އޮފިޝަލުންނެއް ވަނީ ވަޒީފާއިން ވަކިކޮށްފަ އެވެ.

ކޮރޯނާވައިރަސް އާއިގުޅިގެން ދުނިޔޭގެ ސިއްހަތު ޖަމިއްޔާއިން ވަނީ ސިއްހީ އެމަރޖެންސީ ހާލަތު އިއުލާންކޮށްފަ އެވެ. އަދި ޑަބްލިޔުއެޗްއޯގެ ޑިރެކްޓަރ-ޖެނެރަލް ޑރ. ޓެޑްރޯސް އަދްނަމް ވަނީ މި އައުޓްބްރޭކް ކޮންމެފަދަ ގޮތަކަށްވެސް ހިނގައިދާނޭކަމުގެ އިންޒާރު ދެއްވާފަ އެވެ.

ގުޅުންހުރި ލިޔުންތައް

ފަހުގެ ލިޔުންތައް