މިދިޔަ 24 ގަޑިއިރުގެ ތެރޭގައި ކޮރޯނާވައިރަސް އައި ގުޅޭގޮތުން 712 މީހުންނާއި ސުވާލުކޮށް ސްކްރީން ކޮށްފި
މަރްޔަމް ޢަދީލާ
ޝާއިޢު ކުރީ: 01/02/2020
Ministry of Health Health Minister Abdulla Ameen Coronavirus
ޗައިނާއިން ފެތުރެންފަށާފައިވާ ކޮރޯނާވައިރަސްއަށް ޝައްކުވާ މީހަކު ރާއްޖެއިންވެސް ފެނުމާއި ގުޅިގެން ފާއިތުވި 24 ގަޑިއިރުގެ ތެރޭގައި މުޅި ޖުމްލަ 712 މީހުންނާއި ސުވާލުކޮށް ސްކްރީން ކޮށްފައިވާކަމަށް ހެލްތް މިނިސްޓަރ އަބްދުﷲ އަމީން ވިދާޅުވެއްޖެ އެވެ.
ހެލްތް މިނިސްޓްރީއިން މިރޭ ބޭއްވި ނޫސްވެރިންގެ ބައްދަލުވުމުގައި މިނިސްޓަރ އަމީން ވިދާޅުވީ ރާއްޖެއިން ކޮރޯނާވައިރަސްއަށް އަދި ޝައްކުކުރެވިފައިވަނީ އެންމެ މީހެއް ކަމަށެވެ. އަދި ޝައްކުކުރެވިފައިވާ މީހާ ކަރަންޓީނުކޮށް ފަރުވާދެމުންދާއިރު އޭނާގެ ހާލަތު އިހުނަށްވުރެ ރަނގަޅުވަމުން އަންނަކަމަށްވެސް މިނިސްޓަރ ވަނީ ވިދާޅުވެފަ އެވެ.
މިނިސްޓަރ އަމީން އިތުރަށް ވިދާޅުވީ އިންޑިޔާއަށް ފޮނުވި ސާމްޕަލް އެކޮޅަށް މިހާރު ފޯރާފައިވާ ކަމަށާއި އަދި މާދަމާގެ ވަގުތެއްގައި ޓެސްޓްގެ ނަތީޖާ ލިބޭނެ ކަމަށެވެ.
ހަމައެހެންމެ އިންޑިޔާގެ އިތުރުން ތައިލެންޑުންވެސް މިހާރު ކޮރޯނާވައިރަސްއަށް ޓެސްޓްކުރެވޭނެ އިންތިޒާމް ހަމަޖެހިފައިވާ ކަމަށް މިނިސްޓަރގެ ވާހަކައިގައި ވަނީ ފާހަގަކުރައްވާފަ އެވެ.
ރާއްޖެއިން ކޮރޯނާވައިރަސްއަށް ޝައްކުވެގެން މީހަކު ކަރަންޓީނު ކުރިކަން ހެލްތް މިނިސްޓްރީއިން އިއުލާންކޮށްފައިވަނީ ބުރާސްފަތި ދުވަހުގެ ރޭގެ ވަގުތެއްގައެވެ.
ވައިރަސް އަށް ޝައްކުވި މި ޒުވާނާއަކީ ޗައިނާގައި އޮތް ފެއާއެއްގައި ބައިވެރިވުމަށްފަހު ބުރާސްފަތި ދުވަހު ރާއްޖެ އައި މީހެއް ކަމަށާއި ޢޭނާވަނީ ޗައިނާގައި މި ވައިރަސް އެންމެ ބޮޑަށް ފެތުރިފައިވާ ބައެއް އަވަށްތަކުގެ މަސްމާރުކޭޓުތަކަށް ޒިޔާރަތްކޮށްފައި ކަމަށް ހެލްތުން މީގެ ކުރިން ވަނީ ބުނެފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)