ރާއްޖޭގައި މިދުވަސްވަރު ފެތުރޭ އިންފްލުއެންޒާ ހުމުގެ ސަބަބުން ދިވެއްސަކު ނިޔާވެއްޖެއެވެ.
މ. މުލި، މަރިޔާޒް، މުހައްމަދު ރަފީއު ނިޔާވެފައިވަނީ ރޭގެ ވަގުތެއްގައި އައިޖީއެމްއެޗްގައި ފަރުވާދެމުން ދަނިކޮށެވެ.
މިދިޔަ މަހު އެޗްޕީއޭ އިން ނެރުނު ބަޔާނެއްގައި މިދުވަސްވަރު އިންފްލުއެންޒާ ފެތުރޭކަމަށްވަނީ ބުނެފައެވެ. އަދި އޮކްޓޯބަރު މަހާއި އަޅާކިޔާއިރު ނުވެމްބަރު މަހު އިންފްލުއެންޒާ ޖެހިފައިވާ މީހުން އިތުރުވެފައިވާ ކަމަށްވެސް އެޗްޕީއޭއިން ވަނީ ބުނެފައެވެ.
އިންފްލުއެންޒާއަކީ އިންސާނާގެ ނޭވާލާ ނިޒާމަށް ޖެހޭ ބައްޔެކެވެ. އެއީ އިންސާނާގެ ނޭފަތް، ކަރު އަދު ފުއްޕާމެއެވެ. ގިނަ މީހުންނަށް އިންފްލުއެންޒާ ބަލި ޖެހުނަސް ހަށިގަނޑުގެ ދިފާއީ ނިޒާމުން އެބަލިން ރައްކާތެރިކޮށްދެއެވެ. ނަމަވެސް ބައެއް ފަރާތްތަކަށް އިންފްލުއެންޒާގެ ސަބަބުން ގެއްލުން ލިބުމުގެ ފުރުސަތު ބޮޑެވެ. އޭގެ ތެރޭގައި:
- 5 އަހަރުން ދަށުގެ ކުޑަކުދިން
- 65 އަހަރުން މަތީގެ އުމުރުން ދުވަސްވީ މީހުން
- މާބަނޑު އަންހެނުން
- ނޭވާ ހިއްލުން، ހިތުގެ ބަލި، ކިޑްނީގެ ބަލި، ލިވަރ ގެ ބަލި އަދި ހަކުރު ބަލި ފަދަ ބައްޔެއް ޖެހިފައިވާ މީހުން
- ބައްޔެއްގެ ސަބަބުން ހަށިގަނޑުގެ ދިފާއީ ނިޒާމް ބަލިކަށިވެފައިވާ މީހުން
އިންފްލުއެންޒާ ބަލީގެ ބައެއް އަލާމާތްތަކުގެ ތެރޭގައި ހުންއައުން، ކަރުގައި ރިއްސާ ކެއްސުން، ރޯގާ ޖެހުން، އަދި ބޮލުގައި ރިއްސާ ވަރުބަލިވުން ހިމެނެއެވެ. މީގެން އެއްވެސް އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދެއްކުމަކީ މުހިއްމު ކަމެކެވެ.
މީގެ އިތުރުން މިދުވަސްވަރު އެއްވެއުޅުން މަދުކޮށް އަމިއްލަ ސާފުތާހިރުކަން ދެމެހެއްޓުމަށް އެޗްޕީއޭއިން އިރުޝާދުދެއެވެ. އަދި އިންފްލުއެންޒާއަށް ޚާއްސަ ވެކްސިން ޖެހުމަށްވެސް އެޗްޕީއޭއިން ބާރުއަޅައެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)