އާސަންދަގެ މޮބައިލް އެޕްލިކޭޝަން ތައާރަފު ކޮށްފިއެވެ.
"އާސަންދަ"ގެ ނަމުގައި މިއަދު ތައާރަފުކޮށްފައިވާ މި އެޕްލިކޭޝަން މިހާރު ޕްލޭ ސްޓޯރުން ޑައުންލޯޑް ކުރެވެން ހުރި އިރު، އެ އެޕްލިކޭޝަންގައި ދިވެހި ކޮންމެ ރައްޔިތަކަށްވެސް ރަޖިސްޓްރީ ކުރެވޭނެއެވެ. އެ އެޕްގެ އައިއޯއެސް އެޕްލިކޭޝަން ވަރަށް އަވަހަށް ތައާރަފުކުރާނެ ކަމަށް އާސަންދައިން ބުންޏެވެ.
މި އެޕްލިކޭޝަން އަމާޒުކޮށްފައިވަނީ އާސަންދަ ސްކީމްގެ ހިދުމަތް ހޯދާ ދިވެހި ހުރިހާ ރައްޔިތުންނަށް ކަމަށް އެ ކުންފުނިން ބުންޏެވެ. ކޮންމެ ދިވެހި ރައްޔިތަކަށްވެސް މި އެޕްގައި ރަޖިސްޓްރީީ ވެވޭނެ ކަމަށާއި އެޕް ޑައުންލޯޑްކޮށް ރެޖިސްޓާވުމުން، އާސަންދަ ސްކީމްގެ ދަށުން ހިދުމަތް ފޯރުކޮށްދޭ ތަންތަނުގެ ތެރެއިން އާސަންދައިގެ އާ އޮންލައިން ޕޯޓަލް "ވިނަވި" ބޭނުންކުރާ ހުރިހާ ތަނަކުން، އެމީހަކު ހޯދާ ހިދުމަތްތަކުގެ ތަފްސީލު ފެންނާނެ ކަމަށް އެ ކުންފުނިން ބުންޏެވެ.
އެ އެޕްލިކޭޝަން ބޭނުންކޮށްގެން ޑޮކްޓަރުން ދޭ ބޭސް ސިޓީ ނުވަތަ އިލެކްޓްރޯނިކް ބޭސް ސިޓީތައްވެސް ބަލައިލެވޭނެއެވެ. އަދި ނުހޯދާ ހިދުމަތެއް ލިސްޓުކޮށްފައިވާނަމަ އެޕް މެދުވެރިކޮށް އެކަން ރިޕޯޓްކުރުމުން އާސަންދައިން އެކަން ތަހުގީގުކުރާނެއެވެ.
މި އެޕް ތަޢާރަފްކުރުމުގެ މަގުސަދަކީ އާސަންދަ ސްކީމްގެ ކަންކަން ވީހާވެސް ދެ ފުށްފެންނަ ގޮތަކަށް ކުރިއަށް ގެންދިއުން ކަމަށް އާސަންދަ އިން ބުންޏެވެ. އަދި މިވަގުތު ތައާރަފްކުރީ ހަމައެކަނި އެންޑްރޮއިޑް އެޕް ނަމަވެސް ކައިރި މުސްތަގުބަލެއްގައި އައިއޯއެސް އެޕްވެސް ތައާރަފު ކުރާނެ ކަމަށް އެ ކުންފުނިން ބުންޏެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)