ކުޅުދުއްފުށީ ރީޖަނަލް ހޮސްޕިޓަލްގައި ކޮވިޑް-19އަށް ޓެސްޓުކުރާ ޕީސީއާރު މެޝިން ބަހައްޓައި، ޓެސްޓް ކުރަން ފަށައިފި އެވެ.

ޕީސީއާރު ޓެސްޓު ހަދަން ފެށުމަށްޓަކައި ކުޅުދުއްފުށީ ރީޖަނަލް ހޮސްޕިޓަލުގެ ލެބް ޓެކްނޮލޮޖިސްޓުން ވަނީ އައިޖީއެމްއެޗް ހޮސްޕިޓަލުގައި ތިން ހަފުތާގެ ތަމްރީން ޕްރޮގްރާމެއް ފުރިހަމަކޮށްފަ އެވެ.

އަދި މި މެޝިނުން ދުވާލެއްގެ މައްޗަށް މަދުވެގެން 72 ސާމްޕަލް ޓެސްޓު ކުރެވޭނެކަމަށް އެ ހޮސްޕިޓަލުގެ ހެލްތް ސާވިސް މެނޭޖަރ އަހްމަދު ދާއޫދު ވަނީ ވިދާޅުވެފަ އެވެ.

އެހެންނަމަވެސް އަދި ކުޅުދުއްފުށީގައި ތަމްރީން ލިބިފައި ހުރީ ދެ ލެބް ޓެކްނޮލޮޖިސްޓުންނަށް ކަމަށްވުމުން ފުލް ކެޕޭސިޓީގައި ޕީސީއާރު މެޝިން އޮޕަރޭޓް ނުކުރެވޭނެ ކަމަށާއި، ނަމަވެސް ކުރިއަށް އޮތްތަނުގައި މުވައްޒަފުން ތަމްރީން ވެގެން ދާނޭކަމަށް އޭނާވަނީ ވިދާޅުވެފަ އެވެ.

ސަރުކާރުން ރާއްޖޭގެ އެކި ހިސާބުތަކުގައި ކޮރޯނާ ވައިރަސްއަށް ޓެސްޓް ކުރެވޭނެ ގޮތް ހަމަޖެއްސުމަށްޓަކައި ކުރަމުންދާ މަސައްކަތުގެ ތެރެއިން ކުޅުދުއްފުށީ ރީޖަނަލް ހޮސްޕިޓަލުގައި ތައްޔާރު ކުރާ ޕީސީއާރު ލެބްގެ މަސައްކަތް ނިމި މިހާރު ޓެސްޓް ކުރެވޭނެ އިންތިޒާމު ވަނީ ހަމަޖެހިފައި. pic.twitter.com/crivcdcBLB

— Kulhudhuffushi Regional Hospital (@KRHmv) July 5, 2020

ކުޅުދުއްފުށީގައި ޕީސީއަރު މެޝިން ޤާޢިމްކޮށްފައިވަނީ ދުނިޔޭގެ ސިއްހަތު ޖަމިއްޔާއިން ފަންޑުކޮށްގެންނެވެ. އަދި މި ޕީސީއާރު ލެބްގެ މަސައްކަތް ކުރިއަށް ގެންގޮސްފައިވަނީ ވޭވް ލެންތު ކޮމްޕެނީ ޕްރައިވެޓް ލިމިޓެޑުންނެވެ. ލެބްގެ އަމަލީ މަސައްކަތް ނިންމާލެވިފައިވަނީ މިދިޔަ މަހުގެ 4 ވަނަ ދުވަހުގަ އެވެ.

ދާއޫދު ވިދާޅުވީ ޕީސީއާރު މެޝިނާއި ގުޅޭ ސާމާނުތައް އެ ހޮސްޕިޓަލަށް ލިބިފައިވަނީ ޖޫންމަހުގެ 17 ވަނަ ދުވަހުގައި ކަމަށެވެ. އަދި މިދިޔ ތިން ހަފްތާއިން ފެށިގެން އެ ހޮސްޕިޓަލުން ވަނީ މި ކޮވިޑަށް ޓެސްޓް ކުރުމަށް ތައްޔާރުވުމުގެ ގޮތުން މެޝިން ވެލިޑޭޓް ކުރުމުގެ މަސައްކަތާއި، އޮންލައިންކޮށް އިތުރު ތަމްރީންތައް ކުރިއަށް ގެންގޮސްފަ އެވެ.

"މިހާރު މި ހޮސްޕިޓަލުން ރިއަލް ޓައިމް ޕީސީއާރު ޓެސްޓު ކުރެވޭނެ. މިއީ މި ސަރަހައްދުގެ ރައްޔިތުންނަށް ލިބުނު ވަރަށްބޮޑު ލުއި ފަސޭހައެއްކަން ޔަގީން." އަލަށްފެށި މި ހިދުމަތާއި ގުޅޭގޮތުން މައުލޫމާތު ދެއްވަމުން ދާއޫދު ވިދާޅުވެފައި ވެއެވެ.

މީގެއިތުރުން ކުރިއަތް އޮތްތަނުގައި ޖީން އެކްސްޕާޓް ކާރޓްރިޖްތައްވެސް އެ ހޮސްޕިޓަލަށް ލިބޭނެކަމަށް ދާއޫދު ވިދާޅުވިއެވެ. އަދި ޖީން އެކްސްޕާޓް މެޝިންތަކުން ޓެސްޓުކުރުމަށް ވާޏްޖެހޭ ހުރިހާ ތައްޔާރީތަކެއް މިހާރު ނިމިފައިވާކަމަށް ދާއޫދު ވަނީ ވިދާޅުވެފަ އެވެ.

ސަރުކާރުން މީގެ ކުރިން ވަނީ ރާއްޖޭގެ ފަސް ސަރަހައްދެއްގައި ކޮވިޑް-19އަށް ޓެސްޓުކުރުމުގެ ވަސީލަތްތައް ޤާއިމްކުރާނޭކަން އިއުލާންކޮށްފައެވެ. އަދި އޭގެތެރެއިން ގިނަ ސަރަހައްދުތަކެއްގައި މިހާރުވަނީ ޕީސީއާރު މެޝިން ބަހައްޓާ ޓެސްޓުކުރަން ފަށާފައެވެ.

ގުޅުންހުރި ލިޔުންތައް

ފަހުގެ ލިޔުންތައް