ދުނިޔޭގެ ހަކުރުބަލީގެ ދުވަހާއި ގުޅުވައިގެން، މި ބައްޔަށް ސްކްރީންކޮށް މައުލޫމާތު ފޯރުކޮށްދިނުމަށްޓަކައި، ހާއްސަ ސެޝަނެއް ކުރިއަށް ގެންދިއުމަށް އައިޖީއެމް ހޮސްޕިޓަލުން އޭޑީކޭ ފާމަސުޓިކަލްސް އަދި އެސްޓީއޯ އާއި ގުޅިގެން ބާއްވަން ނިންމައިފި އެވެ.
އައިޖީއެމްއެޗުން އިއްޔެ ކޮށްފައިވާ ޓްވީޓްގައި ބުނެފައިވާގޮތުން މި ސެޝަން ކުރިއަށް ގެންދާނީ އަންނަ ބުރާސްފަތި ދުވަހު، މާލޭ ނޯތު ހާބަރު ސަރަހައްދުގަ އެވެ. އަދި މި ސެޝަން ކުރިއަށް ގެންދަން ހަމަޖެހިފައިވަނީ ހެނދުނު 10:00 ފެށިގެން މެންދުރު 12:00އަށް ކަމަށްވެސް އައިޖީއެމްއެޗުން ވަނީ ބުނެފަ އެވެ.
ބައިނަލްއަޤްވާމީ ހަކުރު ބަލީގެ ދުވަސް ފާހަގަކުރަނީ ކޮންމެ އަހަރެއްގެވެސް ނޮވެމްބަރު 14 ވަނަ ދުވަހުގަ އެވެ. 2018 ވަނަ އަހަރާއި މިއަހަރު ހަކުރުބަލީގެ ދުވަހުގެ ތީމެއްގެ ގޮތުގައި ކަނޑައަޅާފައިވަނީ "އާއިލާ އަދި ހަކުރު ބަލި" މި ތީމެވެ.
މިއަހަރުގެ ހަކުރު ބަލީގެ ދުވަހަށް އަމާޒުކޮށް ހެލްތް މިނިސްޓްރީންނާއި އަދި ރާއްޖޭގެ ސިއްހީ ހިދުމަތް ފޯރުކޮށްދޭ އެކިއެކި މުއައްސަސާތަކުން ގެންދަނީ ދުރާލާ މިކަމަށް ހޭލުންތެރިކުރުވުމުގެ މައުލޫމާތުތައް އާއްމުންނަށް ފޯރުކޮށްދެމުންނެވެ.
އައިޖީއެމްއެޗުން އިސްނަގައިގެން މާދަމާ ކުރިއަށް ގެންދިއުމަށް ހަމަޖެހިފައިވާ ސެޝަންތަކުގައި އިސްކޮޅާއި ބަރުދަން ބެލުމާއި، ލޭގެ ޕްރެޝަރ ބެލުމާއި، ހަކުރު ޓެސްޓް ކުރެވޭނެކަމަށް އައިޖީއެމްއެޗުން ކޮށްފައިވާ ޓްވީޓްގައި ވަނީ ބުނެފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)