މި ދަނޑިވަޅަކީ މުޅި ދުނިޔެއަށްވެސް ނުތަނަވަސް ދަނޑިވަޅެކެވެ. މުޅި ދުނިޔެ އޮތީ ފާއިތުވި އެއް ޤަރުނުގެ ތެރޭގައިވެސް ނުދެކޭހާ ބޮޑު ބިރުވެރިކަމެއްގެ ތެރޭގައެވެ. ލޮލަށް ނުފެންނަ ކުޑަކުޑަ ވައިރަހެއްގެ ސަބަބުން މުޅި ދުނިޔެ މިދަނީ ރެއާދުވާލު ލޮލުގެ ނިދި ނަގާލުމަށްފަހު ހޭބޯނާރާ މަސައްކަތްކުރަމުންނެވެ. ހާއްސަކޮށް ސިއްހީ އެހީތެރިންނެވެ.
ސިއްހީ އެހީތެރިންނަކީ އެމީހުންގެ ހަޔާތުގެ ބޮޑުބައެއް މަސައްކަތަށް ހުސްކުރާ ބައެކެވެ. ބައެއް ފަހަރު ކެއުން ބުއިމުން ފެށިގެން ފެންވެރުމާއި ނިދުންވެސް ޤުރުބާންކުރަންޖެހޭ ހާލަތްތައް އާދެއެވެ. އެހެން ފުރާނައެއް ސަލާމަތްކުރުމަށްޓަކައި އަމިއްލަ ފުރާނަ ނުރައްކަލުގެ ތެރެއަށް ހުށަހަޅަނީ ވެސް ހަމަ މިމީހުންނެވެ.
މިދައްކަނީ ހަމައެކަނި ޑޮކްޓަރުންގެ ވާހަކައެއް ނޫނެވެ. ޑޮކްޓަރުންނާއެކު މަސައްކަތްކުރާ ނަރުހުންގެ ވާހަކައެވެ. އެ ސިއްހީ ހިދުމަތްދޭ ތަނެއްގައި ތަހްލީލްތައް ކުރުމަށް މަސައްކަތްކުރާ މުވައްޒަފުންގެ ވާހަކައެވެ. ސިއްހީ ހިދުމަތްދޭތަންތަން ހިންގާ އިދާރީ މުވައްޒަފުންގެ ވާހަކައެވެ. އަދި އެންމެ މުހިއްމު ކަމަކަށް އެ ސިއްހީ ހިދުމަތްދޭ ތަންތަން ސާފުކޮށް ބަލަހައްޓާ މަސައްކަތްތެރިންގެ ވާހަކައެވެ. ނުރައްކާތެރި ކޮވިޑް-19ގެ މި ކޮޅިގަނޑުގައިވެސް އެންމެ ބޮޑެތި ޤުރުބާނީތަކެއް ވަމުންދަނީ ހަމަ މިމީހުންނެވެ.
ނޮވެލް ކޮރޮނާވައިރަސް (ކޮވިޑް-19) ދުނިޔޭގެ އެކިކަންކޮޅުތަކުން ފެނުނު ނަމަވެސް ރާއްޖެއާއި ހަމަޔަށް މިވައިރަސް ވާސިލްވެފައިވަނީ އިއްޔެގައެވެ. އެއާއެކު ސިއްހީ ހިދުމަތްތެރިންނަށް ގިނަ ބަޔަކު ދަނީ ޓްވިޓާ އަދި އެހެން ސޯޝަލް މީޑިޔަތަކުގައި ތައުރީފް އޮއްސަމުންނެވެ.
Those brave doctors, nurses, officers, soldiers and all individuals working at the frontline, fighting against Covid-19, May Allah (SWT) bless you and keep you safe! This is what you prepared yourself for! Just know that you are appreciated! ♥️
— Benchy (@benchy007) March 8, 2020
May Allah keep us all safe. Aameen!
އިއްޔެ ނޫނަސް ރާއްޖޭގެ ސިއްހީ ދާއިރާގެ ގިނަ ބަޔަކު ވަނީ މާކުރިންވެސް އެމީހުންގެ އާއިލާތަކާއި ވަކިވެ ސިއްހީގޮތުން އެހީތެރިވުމުގެ މަސައްކަތްތައް ފައްޓާފައެވެ. އަދި މިހާރުވެސް ރާއްޖޭގެ ހޮސްޕިޓަލްތަކުގައި މަސައްކަތްކުރަމުންދާ މުވައްޒަފުންނަކީ ކޮންމެ ދުވަހަކު މި ރިސްކް ނަގާ މީހުންނެވެ. ތަފާތު އެކި ބަލިތަކުގައި ހޮސްޕިޓަލަށް ޒިޔާރަތްކުރާ މީހުންނަށް އަމިއްލަ ފުރާނައަތަށް ލައިގެން އެހީތެރިވެދޭ ބަޔަކީވެސް ހަމަ މިމީހުންނެވެ.
ހަމައެހެންމެ ދިވެހި ސިފައިންވެސް މިހާރުވަނީ އަމަލީގޮތުން މި މަސައްކަތުގައި ބައިވެރިވެފަ އެވެ. ވައިރަހަށް ޝައްކުކުރެވޭ މީހުން ކަރަންޓީނު ކުރަން އެންމެބޮޑަށް އެހީތެރިކަން ފޯރުކޮށްދޭ ބަޔަކީ ދިވެހި ސިފައިންނެވެ.
This is what we have been preparing. Relax and give your confidence to us. Believe in our works. We will never let you down. Show your togetherness. Show the beautiful behaviours of our religion, share appropriate knowledge. Remind one another to be clean 🧼 #ކުޅުޖެހުންހުއްޓުވާ
— Dr. Mohamed Ali (@Moxamedalu) March 7, 2020
ކޮވިޑް-19 ޗައިނާގައި ފެތުރެމުންދާއިރު އެ ޤައުމުންވެސް ވަނީ އެތައް ސަތޭކަ ސިއްހީ އެހީތެރިންނެއް ވައިރަހުގެ ސަބަބުން މަރުވެފަ އެވެ. އަދި އެތައް ހާސް ސިއްހީ އެހީތެރިންނެއް ވަނީ ވައިރަހުގެ ޝިކާރައަކަށްވެފަ އެވެ. އޭގެތެރޭގައި ހޮސޕިޓަލްތަކުގެ އިސްވެރިންގެ އިތުރުން ކޮރޮނާވައިރަސް އެންމެ ފުރަތަމަ ޗައިނާ ސަރުކާރުގެ ސަމާލުކަމަށް ގެނައި ޑޮކްޓަރުވެސް ހިމެނެއެވެ.
ޗައިނާގައި ކޮވިޑް-19 ޖެހިފައިވާ މީހުންނަށް ފަރުވާދިނުމުގައި ސިއްހީއެހީތެރިން ވަނީ އަމިއްލަ އެތައްކަމެއް ޤުރުބާންކޮށްފަ އެވެ. މަސައްކަތުގެ މާހައުލުގައި ގިނަ ވަގުތު ހޭދަކުރަންޖެހި ބޯ ދޮންނަން އުނދަގޫވުމުން ގިނަ ބަޔަކު ވަނީ އެމީހުންގެ ބޯ ބާލާފައެވެ. އަދި ބައެއް ސިއްހީ އެހީތެރިން ތިބެނީ އެމީހުންގެ ހެޒްމަޓް ސޫޓްގެ ދަށުން ނެޕީޖަހައިގެން ކަމަށްވެސް ގައުމުތަކުގެ ނޫސް އިދާރާތަކުން ރިޕޯޓު ކޮށްފައިވެއެވެ.
މިއީ އަދި ތުންތުންމަތިން ދެކެވިފައި ހުރި ވާހަކަތަކާއި މަންޒަރުތަކެވެ. އެމީހުންގެ ދިރިއުޅުން އެއް ދުވަސްވަންދެން ހޭދަކޮށްލަން ޖެހިއްޖެނަމަ ކޮންމެ މީހަކަށްވެސް ސިއްހީ އެހީތެރިން ވަމުން އެގެންދާ ޤުރުބާނީގެ އަގުވަޒަންކުރެވޭނެ އެވެ.
އެހެންކަމުން އނގިލި ދިއްކޮށްފައި ޤައުމު އަހަންނަށް ކޮށްދިނީ ކޮންކަމެއްތޯ އެހުމުގެ ކުރިން އަހަންނަށް ޤައުމަށް ކޮށްދެވޭނީ ކޮންކަމެއްތޯ ސުވާލުކުރާށެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)