ދުނިޔޭގައި ފެތެރެމުންދާ ކޮރޯނާވައިރަސް (ކޮވިޑް-19) އަށް ފުރަތަމަ ފަހަރަށް ރާއްޖޭގައި މީހަކު ޓެސްޓްކޮށްފި އެވެ. އެމީހާގެ ޓެސްޓްގެ ނަތީޖާ، ކޮވިޑް19 އަށް ނެގަޓިވް އެވެ.
ދުނިޔޭގައި ހަލުވިކަމާ އެކު ފެތުރެމުންދާ ކޮވިޑް-19 ރޯގާގައި 85،000 އަށް ވުރެ ގިނަ މީހުންގެ ގައިން ވައިރަސް ފެނި އަދި 2،900 އަށް ވުރެ ގިނަ މީހުން މިހާރު ވަނީ މަރުވެފަ އެވެ. ރާއްޖެ އިން މިހާތަނަށް އެ ވައިރަސް ފެނިފައި ނުވިޔަސް، އެ ވައިރަހަށް ޓެސްޓް ކުރެވޭނެ އިންތިޒާމް މިހާރު އޮތީ ހަމަޖައްސައިފަ އެވެ.
ހެލްތު މިނިސްޓްރީއިން އިއްޔެ ނެރުނު ބަޔާނެއްގައި ބުނީ ނިއުމޯނިއާ އާއި އަރިދަފުސް ރޯގާ ޖެހި ސީރިއަސް ހާލަތަކަށްދާ މީހުން ކޮވިޑް-19 އަށް ޓެސްޓް ކުރަން ފަށާފައިވާ ކަމަށެވެ.
މިނިސްޓްރީއިން ބުނީ އައިޖީއެމްއެޗްގައި ނިއުމޯނިއާއަށް ފަރުވާދެމުންދާ މީހަކު ކޮވިޑް-19 އަށް ޓެސްޓް ކުރެވިފައިވާ ކަމަށާއި އެމީހާގެ ނަތީޖާ ކޮވިޑް19 ވައިރަހަށް ނެގަޓިވް ކަމަށެވެ.
Press release: Covid-19 situation in Maldives.
— HPA Maldives (@HPA_MV) February 29, 2020
No suspected, or confirmed cases as of now.
As part of strengthening surveillance, 1 person with pneumonia was tested for Covid-19 at IGMH today, and the result is negative.
We will keep updating public on the situation. @MoHmv pic.twitter.com/VBNNTQs9pJ
އަދި މިއީ ރާއްޖޭގައި އެފަދަ ޓެސްޓެއް ކުރި ފުރަތަމަ ފަހަރު ކަމަށާއި ކޮވިޑް-19 ނުވަތަ ކޮރޯނާވައިރަސް ފެތުރޭ ގައުމަކަށް ދަތުރު ނުކުރިޔަސް، ނިއުމޯނިއާ ނުވަތަ އަރިދަފުސް ރޯގާ ޖެހިގެން ސީރިއަސް ހާލަތަކަށް ދާ މީހުން ޓެސްޓް ކުރަން ފަށާފައިވާ ކަމަށް އެ މިނިސްޓްރީން ބުނެ އެވެ.
ކޮވިޑް-19ގެ ހާލަތު ދަނީ ވަރަށް ރަނގަޅަށް މޮނީޓާ ކުރަމުން ކަމަށާއި ރާއްޖެއަށް ބަލި އަތުވެދާނެތީ އަޅަން ޖެހޭ ފިޔަވަޅުތައް އަޅަމުންދާ ކަމަށް މިނިސްޓްރީއިން ބުންޏެވެ. އަދި، ބަލި ރާއްޖެއިން ފެނިއްޖެނަމަ ސިއްރު ނުކޮށް ހާމަ ކުރާނެ ކަމަށް ވެސް މިނިސްޓްރީއިން ބުންޏެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)