އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ)އިން އެބޯލާ ވައިރަސްއަށް ހާއްސަކޮށް އުފެއްދި ފުރަތަމަ ވެކްސިން ބަލައިގެންފި އެވެ. އުމުރުން 18 އަހަރުން މަތީގެ މީހުންނަށް ހާއްސަކޮށް އުފެއްދި މި ވެކްސިން އެފްޑީއޭއިން ރަސްމީކޮށް ބަލައިގެންފައިވަނީ ފާއިތުވި ބުރާސްފަތި ދުވަހުގަ އެވެ.

އެރްވެބޯ ނަމަކަށް ކިޔާ މި ވެކްސިން އުފައްދާފައިވަނީ ދެ އަހަރު ދުވަހުގެ ތަޙްލީލަށްފަހު މިފަހަކަށް އައިސް ދުނިޔޭގައި ފެތުރުނު އެންމެ ބޮޑު ބަލިމަޑުކަމުގެ ދުވަސްވަރުގެ ތެރެއިންނެވެ. އެ ދުވަސްވަރު އެކަނިވެސް އެފްރިކާ ބައްރަށް ނިސްބަތްވާ ގިނީ، ސިއެރާ ލިއޯން އަދި ލައިބީރިއާއިން ވަނީ އެބޯލާ ބަލީގައި 11،000 އަށްވުރެ ގިނަ މީހުން މަރުވެފައެވެ.

މިވެކްސިންގެ ކާމިޔާބީ ރޭޓަކީ 100% އެވެ. އެއީ އެބޯލާ ވައިރަސް ހަށިގަނޑު ތެރެއަށް ވަނުމުގެ މަދުވެގެން 10 ދުވަސް ކުރިން ވެކެސިން ދެވިފައިވާ ނަމައެވެ.

އެރްވެބޯ ވެކްސިނަކީ 2018 ޑިމޮކްރެޓިކް ރިޕަބްލިކް ކޮންގޯގައި އެބޯލާ ވައިރަސް ފެތުރެމުންދަނިކޮށް ވޯލްޑް ހެލްތް އޮގަނައިޒޭޝަނުން ބޭނުންކޮށްފައިވާ ސިންގަލް ޑޯޒް ވެކްސިނެކެވެ.

އެބޯލާގެ ވައިރަސް ފެތުރެން މެދުވެރިވަނީ އެ ވައިރަސް ޖެހިފައިވާ އިންސާނެއްގެ، ނުވަތަ ޖަނަވާރެއްގެ ލޭ ނުވަތަ އެހެންވެސް ހަށިގަނޑުގައި ހިމެނޭ ފްލުއިޑެއްގެ ޒަރިއްޔާއިންނެވެ. މީގެއިތުރުން މި ބަލިޖެހިފަ ތިބޭ މީހުން ބޭނުންކުރާ ތަކެތި ބޭނުން ކުރުމަކީވެސް ބަލި ޖެހުމަށް މެދުވެރިވާ ކަމެކެވެ.

އެބޯލާ ވައިރަސްގެ އަލާމާތްތައް ބަލި ޖެހޭތާ ދެ ދުވަހާއި 21 ދުވަހާއި ދެމެދު ހަށިގަނޑުން ފެންނަން ފަށާނެއެވެ. އެބޯލާ ވައިރަސްގެ އަލާމާތްތަކުގެ ތެރޭގައި ހިމެނެނީ ހުން އައުމާއި، ވަރުބަލިވުމާއި، ގައިގެ މަސްތަކުގައި ރިއްސުމާއި، ބޮލުގައި ރިއްސުމުގެ އިތުރުން ކަރުތެރޭގައި ރިއްސުމެވެ.

ގުޅުންހުރި ލިޔުންތައް

ފަހުގެ ލިޔުންތައް