ކޮންމެ އަހަރެއްގެ ވެސް ޖެނުއަރީ 18 އިން 24 ފާހަގަކުރަނީ ރަހިމުގެ ދޮރަށްޖެހޭ ކެންސަރު ނުވަތަ ސާވިކަލް ކެންސަރަށް ހޭލުންތެރިކުރުވުމަށެވެ. އެގޮތުން މިދިޔަ އަހަރު މުޅި ދުނިޔެއިން ނައްތާލުމަށް ޑަބްލިޔުއެޗްއޯއިން އަމާޒު ހިފާފައިވާ ސާވިކަލް ކެންސަރަށް ހޭލުންތެރިކުރުވުން ވަނީ ކުރިއަށް ގެންގޮސްފަ އެވެ.

ރަހިމުގެ ދޮރަށްޖެހޭ ކެންސަރަކީ އުރަމަތީގެ ކެންސަރަށްފަހު ދެވަނައަށް އެންމެ ގިނަ އަންހެނުން ތަހައްމަލްކުރާ ކެންސަރުގެ ބާވަތެވެ. އަދި މިއީ ދުރާލާ ފިޔަވަޅު އަޅައިފިނަމަ އެންމެ ފަސޭހައިން ރައްކާތެރިވެވޭނެ ކެންސަރުގެ ބާވަތެވެ.

އާންމުކޮށް ރަހިމުގެ ދޮރަށްޖެހޭ ކެންސަރު ތަހައްމަލްކުރަނީ އުމުރުން 35 އަހަރުން މަތީގެ އަންހެނުންނަށެވެ. އަދި ބައެއް ފަހަރު އުމުރުން 20 އަހަރުގައި ވެސް މި ކެންސަރު ޖެހެއެވެ. މި ކެންސަރުން ރައްކާތެރިވުމަށްޓަކައި ވަނީ ވެކްސިނެއް ވެސް އުފައްދާފަ އެވެ.

ރަހިމުގެ ދޮރަށް ކެންސަރު ޖެހުމަށް މަގުފަހިވާ މައިގަނޑު ސަބަބަކީ ހިއުމަން ޕެޕިލޮމާވައިރަސް (އެޗްޕީވީ) އެވެ. އެހެންކަމުން މި ކެންސަރުން ރައްކާތެރިވުމަށްޓަކައި އަންހެން ކުދިންނަށް ޅައުމުރުގައި އެޗްޕީވީ ވެކްސިން ދިނުމަށް ޑަބްލިޔުއެޗްއޯއިން ބާރުއަޅައެވެ. ސަބަބަކީ މި ވެކްސިންގެ އެހީގައި ރަހިމުގެ ދޮރަށްޖެހޭ ކެންސަރުން ދިފާއު ވެވޭތީއެވެ.

މި ކެންސަރު ޖެހިފައިވޭތޯ ބެލުމަށް ސްކްރީން ކުރުން މިހާރުވެސް ގިނަ ސިއްހީ ފަރުވާދޭ ތަންތަނުގައި ކުރިއަށް ގެންދެއެވެ. އެގޮތުން މި ބަލީގެ އަލާމާތްތައް ކުރިއަށް ދެނެގަނެ ބައްޔާއި ގުޅުން ހުރި ސިއްހީ އެހީތެރިއެއްގެ ލަފާ ބަރާބަރަށް ހޯދުމަކީ މުހިއްމު ކަމެކެވެ.

ރަހިމުގެ ދޮރަށްޖެހޭ ކެންސަރުގެ އަލާމާތްތައް:

• އަބަދުވެސް ލޭ ކުލަ ފެންނަން ހުރުން 
• ޕީރިއަޑް ރަނގަޅުނުވެ ދިގުދެމިގެން ދިއުމާއި، އާދަޔާ ހިލާފަށް ގިނައިން ލޭ ފޭބުން
• ދެމަފިރިކަމުގެ ގުޅުން ހިންގުމުން ލޭ އައުން
• ވެޖައިނަލް ޑިސްޗާޖަސް އާދަޔާ ހިލާފަށް ގިނައިން އައުން
• އިއްދައިން ކެނޑުމަށްފަހު ވެސް ލޭފޭބުން

ގުޅުންހުރި ލިޔުންތައް

ފަހުގެ ލިޔުންތައް