މިދުވަސްވަރު ރާއްޖޭގައި ރޯގާއާއި ބޭރަށް ހިންގުން އިތުރުވެފައިވާތީވެ، އާއްމު ސިއްހަތަށް ސަމާލުވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އިލްތިމާސްކޮށްފި އެވެ.
އެޗްޕީއޭއިން އިއްޔެ ކޮށްފައިވާ ޓްވީޓްގައި ވަނީ ރޯގާ އާއި ބޭރަށް ހިންގުމުން ރައްކާތެރިވުމަށް ގިނަގިނައިން އަތްދޮވުމަށް އާއްމުންގެ ކިބައިން އެދިފައެވެ. އެގޮތުން ކުޑަކުދިންގެ ނެޕީ ބަދަލުކުރުމަށްފަހުގައި އަދި ފާހަނާ ބޭނުންކުރުމަށްފަހު ކާބޯތަކެތި ތައްޔާރުކުރުމުގެ ކުރިން ރަނގަޅަށް ސައިބޯނިލައިގެން އަތްދޮވުމަށް އެ އެޖެންސީއިން ވަނީ ބުނެފައެވެ.
ބޭރަށް ހިންގާކަމަށް ބެލެވޭނީ 24 ގަޑިއިރު ތެރޭގައި ތިން ފަހަރަށް ވުރެ ގިނައިން ބޮޑުކަމުދެވިއްޖެ ނަމައެވެ. އަދި ބޭރަށް ހިންގާނަމަ ތިބާއާއި އެހެންމީހުންގެ ރައްކާތެރިކަމަށްޓަކައި، ލަސްނުކޮށް ޑޮކްޓަރެއްގެ ލަފާހޯދުމަށްވެސް އެ އެޖެންސީއިން ވަނީ އިރުޝާދު ދީފައެވެ. ހަމައެހެންމެ އޯ.އާރު.އެސް އަދި ގިނަގިނައިން ދިޔާތަކެތި ބޭނުންކުރުމުގެ އިތުރުން ގޭގައި އަރާމުކުރުމަށްވެސް އެ އެޖެންސީއިން ލަފާދެއެވެ.
އެޗްޕީއޭއިން ވަނީ ގޭގައި ބޯން ބޭނުންކުރާ ފެނަކީ ރައްކާތެރި ފެންކަން ޔަގީންކުރުމަށް ފެން ބޭނުން ކުރުމުގެ ކުރިން ރަނގަޅަށް ކެއްކުމަށް ބުނެފައެވެ. އަދި ކާއެއްޗެހީގައި އަބަދުވެސް މަތިޖަހައި ސާފުތަހިރުކަމަށް ސަމާލުވުމަށްވެސް އެ އެޖެންސީއިން އިރުޝާދު ދެއެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)