ކޮންމެ ދުވަހަކުވެސް ޓީވީ ބަލާ ވަގުތު ދެގަޑިއިރަށް މަދުކުރުމުން އިންސާނާގެ ސިއްހަތު އިތުރަށް ދުޅަހެޔޮކޮށް ހުރުމަށް އެހީތެރިވެދޭކަމަށް ދާދިފަހުން ހެދި ދިރާސާއަކުން ދައްކައިފި އެވެ.

ޔުނިވަރސިޓީ އޮފް ގްލަސްގޯ އިން މި ދިރާސާ ހެދުމަށްޓަކައި ވަނީ އުމުރުން 37-73 އަހަރާއި ދެމެދުގެ 500،000 މީހުން ބައިވެރިކޮށްފަ އެވެ. އަދި ދިރާސާ ޓީމަށް ދިރާސާ އެއްކޮށް ހަދާ ނިންމާލެވިފައިވަނީ ޖުމްލަ 12 އަހަރުންނެވެ.

ދިރާސާގެ ނަތީޖާއެއްގެ ގޮތުން ދިރާސާވެރިން ވަނީ އުމުރުން ދޮށީ މީހުން ސްކްރީން ކައިރީގައި ހޭދަކުރަންޖެހޭ ވަގުތު މަދުކުރަންޖެހޭ ކަމަށް ބުނެފަ އެވެ.

އެގޮތުން ދިރާސާވެރިން ބުނެފައިވާގޮތުން ދިރާސާގައި ބައިވެރިވި މީހުން ޓީވީ ބަލާވަގުތު ކޮންމެ ދުވަހަކު ދެ ގަޑިއިރަށް ލިމިޓްކޮށްފިނަމަ މިމުއްދަތުގައި މަރުވި މީހުންގެ ތެރެއިން 5.62 އިންސައްތަ މީހުން އެކަމުން ސަލާމަތްވެވުނީސް ކަމެވެ. އަދި ހިތުގެ ތަފާތު ބަލިތަކުގައި އެ މުއްދަތުގައި މަރުވި 7.97 އިންސައްތަ މީހުންނަށް އެކަންކަމުން ރައްކާތެރިވުމުގެ ފުރުސަތު އޮތްކަމަށެވެ.

މި ދިރާސާގައި ބުނެފައިވަނީ ހަމައެކަނި ޓީވީގެ ވާހަކައެއް ނޫނެވެ. އޭގެއިތުރުން ލެޕްޓޮޕް، ޓެބްލެޓް އަދި ފޯނުވެސް ހިމެނެއެވެ.

ދިރާސާގައި އިސްކޮށް މަސައްކަތް ކުރެއްވި ޑރ. ހަމިޝް ފޮސްޓަރ ވިދާޅުވަނީ ގިނައިން ޓީވީ ބަލާ، އެއްތަނެއްގައި ހަރަކާތްނުކޮށް ވަގުތު ހޭދަކުރުމުން ސިއްހަތަށް ގެއްލުން ލިބޭކަމަށް މިދިރާސާއިން ހެކިދޭ ކަމަށެވެ.

އާންމުގޮތެއްގައި ސްކްރީން ކައިރީ ގިނަވަގުތު ހޭދަކުރުމަކީ މީހާ ހެލިފެލިވެ އުޅުން ކުޑަކޮށްދޭ ކަމެކެވެ. އަދި އެވަގުތުތަކުގައި އަވަސް އަވަހަށް ބަނޑުހައިވެ ތަފާތު ލުއިކާނާތައް ކެއުމާއި ނިދުން މަދުވުން ފަދަ ސިއްހަތަށް ނުރައްކާތެރި ގިނަ ކަންކަމެއް ކުރިމަތިވެއެވެ.

ނަމަވެސް ސްކްރީން ކުރިމަތީގައި ހޭދަކުރަން ޖެހޭ ވަގުތު ކަނޑައެޅުމަށް އަދިވެސް އިތުރު ދިރާސާތައް ކުރިއަށް ގެންދަން ޖެހޭކަމަށް ޑރ. ފޮސްޓަރ ވިދާޅުވިއެވެ. 

ގުޅުންހުރި ލިޔުންތައް

ފަހުގެ ލިޔުންތައް