ރާއްޖޭގެ ފުރަތަމަ އޯރަލް އެންޑް މެކްސިލޯފޭޝަލް ސާރޖަން އައިޖީއެމްއެޗްގައި
ދިވެހިރާއްޖޭގެ ފުރަތަމަ އޯރަލް އެންޑް މެކްސިލޯފޭޝަލް ސާރޖަން އިންދިރާ ގާންދީ މެމޯރިއަލް ހޮސްޕިޓަލުގައި މަސައްކަތް ކުރައްވަން ފަށައިފިއެވެ.
އެހޮސްޕިޓަލުން އިއްޔެ ނެރުނު ނޫސް ބަޔާނުގައި ބުނެފައިވަނީ ޑރ. ފަތުހުﷲ ސައީދު 5 ޖެނުވަރީ 2020 ވަނަ ދުވަހުން ފަށައިގެން އައިޖީއެމްއެޗް ގައި ޚިދުމަތް ކުރައްވަމުންގެންދަވާނެކަމެވެ.
ރާއްޖޭގެ އެންމެ ބޮޑު ހޮސްޕިޓަލުން ބުނީ ޑރ. ފަތުހުﷲ ސައީދު ހާއްސަވަނީ އަނގަ، މޫނު އަދި ކަނދުރާގެ އޮޕަރޭޝަން ތަކަށް ކަމަށެވެ. އޭގެ ތެރޭގައި އުފެދުމުގައި އަދި ހާނިކަ ވެގެން މޫނުމަތީގައި އުފެދޭ އައިބުތައް އޮޕަރޭޝަންކޮށް ރަނގަޅު ކުރުމާއި، އަނގައިގެ ކެންސަރު ދެނެގަނެ އޮޕަރޭޝަން ކުރުން ހިމެނެއެވެ.
މީގެ އިތުރުން މޫނުމަތީގެ ކޮސްމެޓިކް ސާރޖަރީ، ކޯ ކަށިގަނޑުގެ ބަލިތަކާއި، މޫނުމަތީ އެކި އެކި ތަދުތަކަށް ފަރުވާދިނުން އަދި އިމްޕްލާންޓް ސާރޖަރީ ކުރުމަށް ވެސް ޑރ. ފަތުހުﷲ ސައީދު ހާއްސަ ވެފައިވެއެވެ.
ރާއްޖޭގެ ގިނަ ޑޮކްޓަރުން އާ ދާއިރާތަކުން ސްޕެޝަލައިޒްވުމަކީ ގައުމުގެ ސިއްހީ ދާއިރާ ކުރިއަރިއިގެން ދާނެކަމުގެ މުހިއްމު ނިޝާނެކެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)