ރާއްޖޭގައި ފުރަތަމަ ފަހަރަށް ކިޑްނީ ބަދަލުކުރުމުގެ ހިދުމަތް ފެށުމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)އިން ތައްޔާރުވެއްޖެއެވެ.
ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަފުޅުދައްކަވަމުން އައިޖީއެމްއެޗްގެ އެކްޓިން މެޑިކަލް ޑައިރެކްޓަރ ޑރ. ޔޫސުފް ޝާން ވިދާޅުވީ އެ ހޮސްޕިޓަލުން މިހާރު ދެމުން އަންނަ ހިދުމަތްތައް ފުޅާކޮށް، އާ ހިދުމަތްތައް ތައާރަފްކުރުމަށް ގިނަ މަސައްކަތްތަކެއް ކުރަމުން އަންނަކަށަމެވެ. އެގޮތުން ގެސްޓްރޯއެންޓެރޮލޮޖީގެ ހިދުމަތް ތައާރަފްކޮށް އަންނަ ހަފުތާގައި ފަށައި ކިޑްނީ ޓްރާންސްޕްލާންޓް ކުރަން އަންނަ އަހަރު ފަށާނެ ކަމަށް އޭނާ ވިދާޅުވި އެވެ.
މީގެއިތުރުން ޑރ. ޝާން ވިދާޅުވީ ސްޕެޝަލިސްޓް ހިދުމަތްތަކުގެ ތެރެއިން ނިއުރޯ ސާޖަރީ، އޮންކޯ ސާޖަރީ، ކާޑިއޮލޮޖީ އަދި ނެފްރޮލޮޖީ ހިދުމަތް ފަށާފައިވާ ކަމަށެވެ. އަދި އެންޑޯސްކޮޕީގެ ހިދުމަތް ވެސް ފުޅާވެގެންދާނެކަން ފާހަގަކުރެއްވި އެވެ.
"މިހާރު މި ހަދަނީ ޑައިގްނޯސްޓިކް އެންޑޮސްކޯޕީއެއް. އެކަމަކު ގޭސްޓްރޮއެންޓެރޮލޮޖީ ތައާރަފްވެގެން ތަރައްގީވެގެން ދާއިރު، ވަރަށް ބައިވަރު އާ އިންސްޓްރުމަންޓް ގެނެވި، އިންޓަނޭޝަނަލް އެންޑޮސްކޮޕީ ކުރިއަށްދާނެ. އެންޑޮސްކޯޕީ ކުރިއަށްދާއިރު އެކި ފަރުވާ ދިނުމާއި ހާއްސަ ޓެސްޓުތަކެއް ވެސް ކުރެވިގެންދާނެ. ވަރަށް ބޮޑަށް ފުޅާވެގެންދާނެ،" ކަށީގެ ޚާއްސަ ޑޮކްޓަރު ވިދާޅުވި އެވެ.
ޑރ. ޝާން ވިދާޅުވީ ކިޑްނީ ޓްރާންސްޕްލާންޓް ހެދުމުގެ ކުރިން އޮޕަރޭޝަން ތިއޭޓަރު ތަރައްގީކޮށް އެކަމާ ބެހޭ ގަވާއިދުތަކެއް ހަދަންޖެހޭނެ ކަމަށާއި މިހާރު ކުރަމުން އަންނަނީ އެ މަސައްކަތް ކަމަށެވެ. އަދި ބައެއް ގައުމުތަކުގައި ކިޑްނީ ޓްރާންސްޕްލާންޓްގެ ހިދުމަތް ފަށަނީ ގަވާއިދުތަކެއް ނެތި ކަމަށާއި އެހެންވެ ކިޑްނީ ހޯދުން ފަދަ ކަންކަން ނަހަމަ ގޮތުގައި ހިނގާފައިވާ ކަމަށްވެސް ޑރ. ޝާން ވަނީ ވިދާޅުވެފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)