ކޮވިޑް-19 ޕެންޑަމިކް އާއި ގުޅިގެން މޯލްޑިވްސް މެޑިކަލް އެންޑް ޑެންޓަލް ކައުންސިލު (އެމްއެމްޑީސީ) ގައި ރަޖިސްޓްރީ ކޮށްފައިވާ ޑޮކްޓަރުންގެ ރަޖިސްޓްރޭޝަނާއި ލައިސަންސް އައުކުރުމުގެ މުއްދަތު އިތުރުކޮށްދީފައިވާ ކަމަށް އެ ކައުންސިލުން ބުނެފި އެވެ.
އެމްއެމްޑީސީއިން މިއަދު ނެރުނު ސާރކިއުލާރގައި ބުނެފައިވާގޮތުން މިދުވަސްވަރު ރަޖިސްޓްރޭޝަންގެ މުއްދަތު ހަމަވާ ޑޮކްޓަރުންގެ ރަޖިސްޓްރޭޝަން އޮގަސްޓް 31ގެ ނިޔަލަށް ވަނީ އިތުރުކޮށްދީފަ އެވެ. އަދި ރަޖިސްޓްރޭޝަން ހަމަވުމަށްފަހުވެސް އޮގަސްޓް 31ގެ ނިޔަލަށް މަސައްކަތް ކުރުމުގެ ހުއްދަވެސް ދީފައިވާކަމަށް އެ ކައުންސިލުން ވަނީ ބުނެފަ އެވެ.
ހަމައެހެންމެ މިޙާލަތުގައި ރަޖިސްޓްރީވާން ބޭނުންވާ ޑޮކްޓަރުންނަށް ވަގުތީ ރަޖިސްޓްރޭޝަން ދޫކުރުމުގެ އިންތިޒާމް އެމްއެމްޑީސީއިން ވަނީ އިންތިޒާމްކޮށްދީފަ އެވެ. އެގޮތުން ވަގުތީ ރަޖިސްޓްރޭޝަން ބޭނުންވާ ޑޮކްޓަރުން އެ ކައުންސިލްގެ މެއިލް (mmdc@health.gov.mv)އަށް ފުރިހަމަކޮށްފައިވާ ރަޖިސްޓްރޭޝަން ފޯމާއި، ތައުލީމީ ސަނަދާއި، އިންޓާރންޝިޕް ސެޓްފިކެޓްގެ އިތުރުން އައިޑީކާޑުގެ ކޮޕީ ފޮނުވުމަށް އެ ކައުންސިލުން ވަނީ އެދިފަ އެވެ.
އެހެންނަމަވެސް ސަރުކާރު އޮފީސް ހުޅުވުމަށްފަހު ގިނަވެގެން 30 ދުވަހުގެ ތެރޭގައި ރަޖިސްޓްރޭޝަން އައުކުރުމުގެ ކަންތައްތައް އޮންނަ އުސޫލުގެ ދަށުން ކުރިއަށް ގެންދިއުމަށް އެ ކައުންސިލުން ވަނީ ޑޮކްޓަރުންނަށް އިލްތިމާސް ކޮށްފަ އެވެ.
ރާއްޖޭގައި ކޮވިޑް-19 ލޮކްޑައުން އާއި ގުޅިގެން ރަޖިސްޓްރޭޝަން އައު ނުކުރެވި މިހާރުވެސް ގިނަ ޑޮކްޓަރުންނެއް އެބަތިއްބެވެ. އަދި ކޮވިޑް-19 އާއި ގުޅިގެން އެހެން ޤައުމުތަކުގައި ޑޮކްޓަރީކަން ކިޔަވަމުންދާ ގިނަ ދަރިވަރުންނެއް ވަނީ ރާއްޖެ އައިސް ކޮވިޑް-19 ފްރަންޓްލައިންގައި މަސައްކަތް ކުރަން ފަށާފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)