ކޮންމެ އަހަރެއްގެ ވެސް އޭޕްރިލް މަހުގެ 19 އިން 25އަށް ފާހަގަކުރަނީ ލެބް ޕްރޮފެޝަނަލުންގެ ހަފްތާގެ ގޮތުގަ އެވެ. ބަލިމީހުންގެ ހަދަންޖެހޭ ޓެސްޓްތަކުގެ ސާމްޕަލްތައް ނަގައި އެ ސާމްޕަލްތައް ޕްރޮސަސް ކުރުމަކީ މި ފަރާތްތަކުގެ ކޮންމެ ދުވަހެއްގެ ވަޒީފާ އެވެ.
ބުރަ އަދި މި ކަވި މަސައްކަތް ކުރާ ލެބް ޕްރޮފެޝަނަލުންގެ އަގުވަނީ އައިޖީއެމްއެޗް ހޮސްޕިޓަލުން ވެސް ވަޒަންކޮށްފަ އެވެ.
ރާއްޖޭގެ މައި ހޮސްޕިޓަލް ކަމަށްވާ އައިޖީއެމްއެޗް ހޮސްޕިޓަލްގެ ލެބޯޓްރީގައި މަސައްކަތްކުރާ ލެބް ޕްރޮފެޝަނަލުން ދުވާލެއްގެ މައްޗަށް 1،500 އެއްހާ ސާމްޕަލެއް ޕްރޮސަސް ކުރެއެވެ. އޭގެތެރޭގައި ކްލިނިކްތަކުންނާއި ރާއްޖޭގެ ގިނަ ސިއްހީ ހިދުމަތްދޭ މަރުކަޒުތަކަކުން ހެދުމަށް ދޭ ޓެސްތަކުގެ ސާމްޕަލްތައް ވެސް ހިމެނެ އެވެ.
ހާއްސަކޮށް ދުނިޔެ ދެކެމުންދާ ކޮރޯނާވައިރަހުގެ ނުރައްކާތެރި ދަނޑިވަޅުގައި ފްރަންޓްލައިންގައި މަސައްކަތް ކުރާ އެއްބަޔަކަށް ލެބް ޕްރޮފެޝަނަލުން ވާނެ އެވެ. މި ދަނޑިވަޅުގައި ކުރަންޖޭހޭ މަސައްކަތް ޑަބަލްވި ނަމަވެސް އެއްވެސް ކަހަލަ އިމެއްނެތި ލެބް ޕްރޮފެޝަނަލުން ދަނީ އެމީހުންގެ ޒިންމާ އަދާކުރަމުންނެވެ.
އައިޖީއެމްއެޗުން ބުނިގޮތުގައި މުޅި ރާއްޖެ ހިމެނޭގޮތަށް ހިސްޓޯޕެތޮލޮޖީގެ ގިނަ ސާމްޕަލްތަކެއް ޕްރޮސަސް ކުރަމުންދަނީ ވެސް ހަމަ އެހޮސްޕިޓަލުންނެވެ. އަދި ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ހުރިހާ ސަރވައިލަންސް ޓެސްޓުތަކެއް ހެދުމަށްވެސް ބަރޯސާ ހޮސްޕިޓަލަކީ އައިޖީއެމްއެޗެވެ.
މީގެ އިތުރުން ލެބް ޕްރޮފެޝަނަލުންގެ އެންމެ ހާއްސަ ކަމަކީ ކޮންމެ ކަހަލަ އައުޓްބްރޭކެއް ކުރިމަތިވި ނަމަވެސް އެންމެ ބޮޑަށް ރައްޔިތުން ބަރޯސާވާ ބަޔަކީ ލެބް ޕްރޮފެޝަނަލުންނަށް ވުމެވެ. އޭގެ ނަތީޖާއެއްގެ ލެބް ޕްރޮފެޝަނަލުން ވަނީ މިފަދަ ކޮންމެ އައުޓްބްރޭކެއް އަދި ޑެންގޫ އިން ފެށިގެން އިންފުލުއެންޒާއަށް ވިޔަސް ކޮންމެ ކަމެއްގައި ވެސް ވަރުބަލިކަމެއް ނެތި އެތައް ވަގުތެއް ޤުރުބާން ކޮށްފައެވެ.
ލެބް ޕްރޮފެޝަނަލުންގެ ހަފްތާ ފާހަގަކުރަމުންދާއިރު، ނުފެނުނު ނަމަވެސް މިއީ ރައްޔިތުން އެންމެ ބޮޑަށް އެބައެއްގެ އަގުވަޒަން ކުރަންޖެހޭ މީހުންނެވެ. ދުލުން ބުނެލަން ފަސޭހަވި ނަމަވެސް ލެބް ޕްރޮފެޝަނަލުންގެ މަސައްކަތަކީ އާދައިގެ މަސައްކަތެއް ނޫނެވެ. އެހެންގޮތަކަށް ބުނާނަމަ މިއީ ސިއްހީ ނިޒާމުގެ މައި ތަނބެވެ. މި ފަދަ ބަތަލުންނާއި ނުލައި ނަތީޖާއަކަށް ވާސިލްވުމަކީ ނާދިރު ކަމެކެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)