މިއަދު އެކަނިވެސް މާލޭ ސިޓީއިން 17 މީހުން ކޯވިޑް-19އަށް ޕޮޒިޓިވް ވެއްޖެއެވެ.
ކޯވިޑް-19އަށް މިއަދު އެންމެ ފުރަތަމަ މީހުން ޕޮޒިޓިވް ވެފައިވަނީ ރޭ ދަންވަރު އެވެ. ކޭސް 68 އަދި 69 އެއްގައި ހިމެނޭ މި ދެމީހުންނަކީ ބަންގްލަދޭޝް އާއި ދިވެއްސެއްކެވެ.
އޭގެފަހުން މިއަދު ހެނދުނު ވަނީ އެއްފަހަރާ 13 މީހުން މާލޭ ސިޓީއިން ވައިރަހަށް ޕޮޒިޓިވް ވެފައެވެ. ކޭސް 70، 71، 72، 73، 74، 75، 76، 77، 78، 79، 80، 81، 82 ގައި ހިމެނޭ މި 13 މީހުންގެ ތެރޭގައި ފަސް ބަންގްލަދޭޝް މީހުންނާއި އަށް ދިވެހިން ހިމެނެއެވެ. އޭގެތެރޭގައި ސިފައިންގެ އޮފިސަރެއްގެ އިތުރުން މިއަދު ބަންގްލަދޭޝްއަށް ފޮނުވާލަން ނިންމި މީހުންގެ ތެރެއިން 3 މީހަކު ވެސް ހިމެނެއެވެ.
މީގެ ތެރެއިން ކޭސް 81 އަކީ 80 އަހަރުގެ މީހެކެވެ. އޭނާ ހާލު ބޮޑުވުމުގެ ސަބަބުން ވަނީ ދަރުމަވަންތަ ހޮސްޕިޓަލަށް ބަދަލުކޮށްފަ އެވެ.
އެއަށްފަހު މިއަދު މެންދުރުވަނީ މާލެއިން ބަންގްލަދޭޝްގެ ރައްޔިތެއް ވައިރަހަށް ޕޮޒިޓިވް ވެފައެވެ. މީނައަކީ ކޭސް 83 އެކެވެ.
އޭގެފަހުން މިރޭވަނީ އިތުރު ދިވެއްސެއް ވައިރަހަށް ޕޮޒިޓިވް ވެފައެވެ. ކޭސް 84 ވަނައަށް ޕޮޒިޓިވްވި މިމީހާ އަކީ ކޭސް 52 އަކާއި ޑައިރެކްޓް ކޮންޓެކްޓް ވެފައިވާ މީހެކެވެ.
މިހާތަނަށް ރާއްޖެއިން ވަނީ ޖުމްލަ 84 މީހަކު ވައިރަހަށް ޕޮޒިޓިވް ވެފައެވެ. އަދި މާލެއިން ޕޮޒިޓިވްވި މީހުންގެ އަދަދުވަނީ 64 އަށް އަރާފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)