އެމިރާކާގެ ރައްޔިތުން ފަރުދީ ޒިންމާ އަދާކޮށް ގައިދުރު ކުރުން އިސްކުރުމުގެ ނަތީޖާއަކަށްވީ ކޮވިޑް-19 ގެ ސަބަބަން މީހުން މަރުވާނެކަމަށް ކުރިން ލަފާކުރި އަދަދު 12 އިންސައްތަ ދަށަށް ދިޔުމެވެ. އަދި އެކި ސިޓީތަކުގައި ނަގާފައި ހުރި ފިޔަވަޅުތައް މެއި މަހު ކުރީކޮޅު ލުއި ކުރެވޭނެ ކަމުގެ ފުރުސަތު ބޮޑުވުމެވެ.

ކޮވިޑް-19 އާއި ގުޅިގެން ޔުނިވަރސިޓީ އޮފް ވޮޝިންގްޓަން އިން މިބަލީގެ ލަފާކުރުންތައް ގަވާއިދުން ޝާއިއު ކުރަމުން އާދެއެވެ. މިދިރާސާ ޓީމުގެ ލަފާކުރުން ތަކަކީ އެމެރިކާގެ ސަރުކާރު އިދާރާތަކުންނާއި ވައިޓް ހައުސް އޮފިޝަލުންވެސް ހަވާލާދީ މައުލޫމާތުދޭ އަދަދު ތަކެކެވެ.

އެގޮތުން މިހަފްތާ ކުރީކޮޅު މިޓީމުން ލަފާކޮށްފައިވަނީ އޮގަސްޓް 4 އަކާއި ހަމައަށް 68،841 މީހުން އެމެރިކާގައި މަރުވާނެ ކަމަށެވެ. ނަމަވެސް ހުކުރު ދުވަހު ޝާއިއު ކުރި ރިޕޯޓުގައި އެޓީމުން ލަފާކޮށަފައިވަނީ އޮގަސްޓް 4 އަކާއި ހަމައަށް 60،308 މީހުން އެމެރިކާގައި މަރުވާނެ ކަމަށެވެ.

މިހެން މިދިމާވީ ގައުމުގެ އިދާރާތަކުންނާއި އާއްމުން ނެގި ފިޔަވަޅުތަކުންކަން ދިރާސާ ޓީމުން ފާހަގަކޮށްފައިވެއެވެ.

އެމެރިކާގެ 50 ސްޓޭޓުގެ ތެރެއިން 42 ސްޓޭޓެއްގައި ފާއިތުވި ހަތަރު ހަފްތާގެ ތެރޭގައި އާއްމުން ގޭގައި މަޑުކުރުމަށާއި، ވިޔަފާރިތައް ބަންދުކުރުމަށް އަންގާފައިވެއެވެ. 

ހަމައެއާކު ގިނަ ރައްޔިތުން އެމީހުންގެ ފަރުދީ ޒިންމާ އެންމެ ފުރިހަމަ ގޮތުގައި އަދާކުރިތަން ފެނުނު ކަންވެސް ދިރާސާ ޓީމުގެ އިސް އޮފިޝަލަކު ވިދާޅުވިއެވެ.

މިހާތަނަށް އެމެރިކާއިން 700،000 އަށް ވުރެ ގިނަ މީހުން ކޮވިޑް-19 އަށް ޕޮޒިޓިވް ވެފައިވާއިރު 37،000 އަށް ވުރެ ގިނަ މީހުންވަނީ ބަލީގެ ސަބަބުން މަރުވެފައެވެ.

ގުޅުންހުރި ލިޔުންތައް

ފަހުގެ ލިޔުންތައް