މާލެއިން ކޯވިޑް-19އަށް ހަތްވަނަ މީހަކު ޕޮޒިޓިވް ވުމާއެކު މާލޭ ސަރަހައްދުގައި އިއުލާންކޮށްފައިވާ ލޮކްޑައުން އިތުރު 14 ދުވަހަށް އިތުރުކޮށްފި އެވެ.
ލޮކްޑައުންގެ މުއްދަތު އިތުރުކުރިކަން އަންގާ އެޗްޕީއޭއިން ނެރުނު ބަޔާނުގައިވަނީ ޤާނޫނުގެ 33 ވަނަ މާއްދާގެ ދަށުން، އިއުލާންކޮށްފައިވާ އާންމު ސިއްހަތުގެ ކުއްލި ނުރައްކަލުގެ ހާލަތާއި ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިފައިވާ ބާރުގެ ދަށުން، އެޗްޕީއޭއިން އަންގާ ވަގުތުން ފެށިގެން އިތުރު 14 ދުވަހަށް މާލެ، ހުޅުމާލެ އަދި ވިލިގިލީގެ މަގުމައްޗަށް ނިކުމެ އުޅުމާއި، އެއްގަމު އުޅަނދުފަހަރު ދުއްވުން މަނާކޮށްފައިވާ ކަމަށެވެ.
މި އެންގުމުގެ ދަށުން އަޅާފައިވާ ބައެއް ފިޔަވަޅުތަކުގެ ތެރޭގައި:
1. މާލޭ ސަރަހައްދުގައި މަގުތަކަށް ނުކުމެއުޅުމާއި، މަގުމައްޗާއި އާންމު ތަންތަނަށް ނިކުތުން މަނާކުރުން.
2. މާލޭ ސަރަހައްދުގެ ޕަބްލިކް ޓްރާންސްޕޯޓު (ބަހާއި، ފެރީ) ގެ ހިދުމަތް ހުއްޓާލުން
3. މާލެ، ވިލިމާލެ، ހުޅުމާލެ، ތިލަފުށި، ގުޅީފަޅަށް މީހުން އަރައި ފޭބުން ހުއްޓާލުން
އެޗްޕީއޭއިން ބުނީ އެ އެޖެންސީއިން އެޅި ފިޔަވަޅުތަކުން ފުލުހުންނާއި، ސިއްހީ ހިދުމަތްދޭ އިދާރާތަކުގެ މުވައްޒަފުންނާއި އެ އިދާރާތަކުގެ އުޅަނދުތައް ދުއްވާ މުވައްޒަފުންނާއި، އެން.އީ.އޯ.ސީގެ ހާއްސަ ހުއްދަ ލިބިފައިވާ މީޑިޔާތަކާއި އަދި ފަރާތްތައް އިސްތިސްނާވާނޭ ކަމަށެވެ.
އެޗްޕީއޭއިން ވަނިކޮށް މި ފިޔަވަޅުތައް ތަންފީޒުކުރުމަށްޓަކައި އާންމުންގެ ކިބައިން އެދިފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)