O- އަދި B- ލޭ މަދުވެއްޖެ، އަވަހަށް ލޭ ހަދިޔާ ކޮށްދެއްވާ: މޯލްޑިވްސް ބްލަޑް ސާވިސަސް
ބްލަޑް ބޭންކްގައި ހުރި O- އަދި B- ލޭ މަދުވުމާއި ގުޅިގެން މޯލްޑިވްސް ބްލަޑް ސާވިސަސް އިން އާއްމުންގެ އެހީއަށް އެދިއްޖެ އެވެ.
އެގޮތުން ކޯވިޑް-19 އާއި ގުޅިގެން ރާއްޖެއިން ލޭ ލިބުން ދަތިވެފައިވާތީ ލޭ ހަދިޔާ ކުރަން ބޭނުންވާ ފަރާތްތަކަށް މާދަމާވެސް އެ ފުރުސަތު އެބަ އޮތް ކަމަށް މޯލްޑިވްސް ބްލަޑް ސާވިސަސް އިން ވަނީ ބުނެފައެވެ.
މޯލްޑިވްސް ބްލަޑް ސާވިސަސް އިން ވަނީ މާދަމާ ހެނދުނު 10:00 އިން މެންދުރުފަހު 15:00 އާ ހަމައަށް މޯލްޑިވްސް ބްލަޑް ސާވިސްއަށް އައިސް ލޭ ހަދިޔާކުރެވޭނޭ ކަމަށް ބުނެފައެވެ.
ރާއްޖޭގައި ދިރިއުޅޭ ތެލެސީމިޔާ ކުދިންނަށް މި ދުވަސްވަރު ލޭ ލިބުންވަނީ ވަރަށް ބޮޑަށް ދަތިވެފައެވެ އެކަމާއި ގުޅިގެން ތެލެސީމިޔާ ސެންޓަރާއި މޯލްޑިވްސް ބްލަޑް ސާވިސަސް އިން އަންނަނީ ލޭ ހަދިޔާ ކުރުމުގެ ކޭމްޕްތައް ހިންގަމުންނެވެ.
ލޭ އަޅާ ކުދިންނަށް އެންމެ ބޮޑަށް ލޭ ހޯދުމުގައި އެހީތެރިވާ ބަޔަކީ ރާއްޖޭގެ ރިސޯޓުތަކުގެ މުވައްޒަފުންނެވެ. އެހެންނަމަވެސް ގިނަ ރިސޯޓު މުވައްޒަފުން ރިސޯޓުތަކުގައި ލޮކްޑައުންގައި ތިބުމުން ލޭ ލިބުމަށްދަތި ވެފައިވާކަމަށް ކޯވިޑް-19ގެ ތަރުޖަމާނު މަބްރޫކް އަޒީޒް ވަނީ ވިދާޅުވެފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)