ކޯވިޑް-19 އާއި ގުޅިގެން މުޅި މާލެ އަދި ހުޅުމާލެ ޑިސްއިންފެކްޓް ކުރުމުގެ ހަރަކާތެއް ކުރިއަށްގެންދިއުމަށް ނިންމާފައިވާކަމަށް ސްޕޯކްސްޕާރސަން މަބްރޫކް އަޒީޒް ވިދާޅުވެއްޖެއެވެ.
އެގޮތުން މާލެ ޑިސްއިންފެކްޓްކުރަން ނިންމާފައިވަނީ މާލޭ ސިޓީ ކައުންސިލްގެ ފަރާތުން މާދަމާ ހެނދުނު 8 ޖަހާއިރު އެވެ. އަދި އެޗްޑީސީގެ ފަރާތުން މާދަމާ ހުޅުމާލެވެސް ޑިސްއިންފެކްޓް ކުރާނޭކަމަށް މަބްރޫކްވަނީ ވިދާޅުވެފައެވެ.
މާލޭ ސިޓީ ކައުންސިލުން މިއަދު ނެރުނު އިއުލާނެއްގައި ބުނީ ކޮވިޑް-19 ވައިރަސްއިން ރައްކާތެރިވުމުގެ ގޮތުން ކުލޮރިން އަޅައިގެން މާލޭގެ މަގުތައް ދޮވެ ސާފުކުރުމުގެ މަސައްކަތް އެ ކައުންސިލާއި ސިފައިން ގުޅިގެން ކުރަމުންދާއިރު، އަޑީގައި ކުނި ޖަމާވާ ގޮތަށް މަގުމަތީގައި ބަހައްޓާފައި ހުރި ޕެލެޓުތަކާއި ހަލާކުވެފައި ހުރި ޕެލެޓުތައް ނެގުމުގެ މަސައްކަތް ކުރަމުންދާނެ ކަމަށެވެ.
ކޮވިޑް-19 ވައިރަސް ރާއްޖެއިންވެސް ފެނިފައިވާއިރު، ސަރުކާރުން ވަނީ މި މަހުގެ 12 ވަނަ ދުވަހު އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާނުކޮށްފައެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)