ރާއްޖޭގައި މިވަގުތު ކޮވިޑް-19 ޖެހިފައި ތިބި މީހުން (އެކްޓިވް ކޭސް)ތަކުގެ އަދަދު ހުރީ ހާހުން މަތީގައި ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭގެ) ތަފާސް ހިސާބުތަކުން ދައްކައިފި އެވެ.

އެޗްޕީއޭއިން ރޭ އާންމުކުރި ތަފާސް ހިސާބުތަކުން ދައްކާގޮތުގައި އިއްޔެ އެކަނިވެސް ރާއްޖެއިން ވަނީ 145 މީހަކު ކޮވިޑަށް ޕޮޒިޓިވްވެފައެވެ. އަދި މި އަދަދާއެކު އެކްޓިވް ކޭސްތަކުގެ އަދަދު ވަނީ 1،273އަށް އަރާފަ އެވެ. 

މީގެތެރެއިން 93 މީހުންނަށް މިހާރުވެސް ހޮސްޕިޓަލްތަކުގައި އެނދުމަތިކޮށް ފަރުވާދެމުން އަންނަކަމަށް އެޗްޕީއޭއިން ވަނީ ބުނެފަ އެވެ.

ކޮވިޑްގެ ކޭސްތައް އާދަޔާ ހިލާފަށް ގިނަވަމުންދާތީވެ، އެޗްޕީއޭއިން ވަނީ ރައްކާތެރިކަމުގެ ފިޔަވަޅުތައް އަނެއްކާވެސް ވަރުގަދަ ކޮށްފަ އެވެ. އެގޮތުން ދަންވަރު 12:00 އިން ފަތިހު 4:00އަށް ކާފިއު އިއުލާންކޮށް، ހަފްލާތަކާއި ޖަލްސާތައް ބޭއްވުން ވަނީ މަނާކޮށްފަ އެވެ.

ހަމައެހެންމެ، ރާއްޖެއިން ބޭރުން އަންނަ ދިވެހިން 10 ދުވަހަށް ކަރަންޓީނު ފުރިހަމަ ކުރަންޖެހޭގޮތަށް އެޗްޕީއޭގެ އުސޫލުތަކަށް ވަނީ ބަދަލު ގެނެސްފައެވެ.

ރާއްޖެއިން މިހާތަނަށް ވަނީ މި ވައިރަހަށް 15،247 މީހުން ޕޮޒިޓިވްވެފަ އެވެ. އޭގެތެރެއިން 13،916 މީހުން ބަލިން ރަނގަޅުވެފައިވާއިރު، 51 މީހަކުވަނީ މި ބަލީގައި މިހާތަނަށް މަރުވެފަ އެވެ.

ގުޅުންހުރި ލިޔުންތައް

ފަހުގެ ލިޔުންތައް