ޗައިނާއިން ފެތުރެން ފެށި ކޮރޯނާވައިރަހުގެ ދެވަނަ ރާޅެއް ނެގިފަހުން އިއްޔެ އާއި ހަމަޔަށް ދުނިޔޭގެ އެކި ހިސާބުތަކުން ވައިރަހަށް ޕޮޒިޓިވްވި މީހުންގެ އަދަދު ވަނީ 50 މިލިޔަން ހުރަސްކޮށްފަ އެވެ.

ކޮވިޑް-19 ޕެންޑަމިކް ފެށުނު ފަހުން އެންމެ ގިނަ އަދަދެއްގެ މީހުން ޕޮޱިޓިވްވެފައި ވަނީ ފާއިތުވި އޮކްޓޫބަރު މަހުގަ އެވެ. އެގޮތުން ފާއިތުވި މަސްތެރޭގައި އެމެރިކާއިން އެކަނިވެސް ވަނީ ދުވާލެއްގެ މައްޗަށް 100،000 ޕޮޒިޓިވް ކޭސް ފެނިފަ އެވެ. 

އަދި ފާއިތުވި ހަތް ދުވަސްތެރޭގައި ވައިރަހަށް ޕޮޒިޓިވްވި މީހުންގެ އަދަދު ވަނީ 540،000 އަށް އަރާފަ އެވެ. އަދި މިހާތަނަށް މި ބަލީގައި ވަނީ 1.25 މިލިޔަނަށްވުރެ ގިނަ މީހުން މަރުވެފަ އެވެ. 

މި ޕެންޑަމިކްގެ ސްޕީޑް ދަށްވެ މި ދޭތެރެއިން 30 މިލިޔަނުން 40 މިލިޔަނަށް އަރަން 32 ދުވަސް ނެގިނަމަވެސް، މި އަދަދު 50 މިލިޔަނަށް އަރާފައިވަނީ އެންމެ 21 ދުވަސްތެރޭގަ އެވެ. 

މިހާތަނަށް ކޮވިޑުގެ އަސަރު އެންމެ ބޮޑަށް ކޮށްފައިވަނީ ޔޫރަޕް އަށެވެ. އެގޮތުން އެ ސަރަހައްދުން އެކަނި 12 މިލިޔަން ކޮވިޑު ކޭސް ވަނީ ފެނިފަ އެވެ. އަދި ކޮވިޑުގައި މިހާތަނަށް މަރުވި މީހުންގެ 24 އިންސައްތަ ނިސްބަތްވަނީ ޔޫރަޕަށެވެ.

ފްރާންސުން ފާއިތުވި ހަތް ދުވަސްތެރޭގައި ދުވާލެއްގެ މައްޗަށް ޕޮޒިޓިވް ރޭޓް އުޅެނީ 54،000 ގައެވެ.

ގުޅުންހުރި ލިޔުންތައް

ފަހުގެ ލިޔުންތައް