ކޯވިޑް-19އަށް ތަހުލީލުކޮށް 90 މިނެޓުގެ ތެރޭގައި ނަތީޖާ ލިބޭ ތަހުލީލު ކިޓުތަކެއް އިނގިރޭސިވިލާތުގެ ހަސްފަތާލުތަކާއި މުސްކުޅިން ބަލަހައްޓާ މަރުކަޒުތަކާއި ލެބޯޓަރީތަކުގައި ބޭނުންކުރަން ތައްޔާރުވެއްޖެއެވެ.

މީގެ ތެރޭގައި 5.8 މިލިއަން ޑީއެންއޭ ޓެސްޓާއި 450،000 ސްވަބް ޓެސްޓު ހިމެނެއެވެ.

ގާތްގަނޑަކަށް ވަގުތުން ނަތީޖާ ލިބޭ މި ކިޓުތަކުގެ ސަބަބުން، ކޮވިޑާއި އެފަދަ އެހެން ބަލިތަކުގެ ފަރަގު ދެނަގަންނަން ސިއްހީ މާހިރުންނަށް ފަސޭހަ ވެގެންދާނެކަމަށް ޔޫކޭގެ ހެލްތު ސެކްރެޓަރީ މެޓް ހެންކޮކް ވަނީ ވިދާޅުވެފަ އެވެ. އަދި އެ ތަހުލީލުތަކުން ކޯވިޑް-19ގެ އިތުރުން ޢާންމު ރޯގާވެސް ދެނެގަނެވޭނެކަމަށާއި ކުރިއަށްއޮތް ފިނި މޫސުމުގައި އޭގެ ބޭނުން ވަރަށް މުހިންމުވާނެކަމަށް އޭނާ ވިދާޅުވިއެވެ.

މީގެ އިތުރުން މިޓެސްޓުތައް ކުރުމުގައި އުޅޭ ފަރާތްތައް އިތުރު ތަމްރީނަކާއި ނުލާ ޓެސްޓުތައް ކުރަން އެނގޭނެކަމަށް އިނގިރޭސިވިލާތުގެ ހެލްތު މިނިސްޓްރީ އިން ވަނީ ބުނެފައެވެ. 

މިހާރު ދުނިޔޭގެ އެކި ކަންކޮޅުތަކުގައި ކޮވިޑަށް ޓެސްޓުކުރަން ބޭނުންކުރާ ގިނަ ކިޓުތަކުގެ ނަތީޖާ ލިބެން 24 ގަޑިއިރަށް ވުރެ ގިނަ ވަގުތު ހޭދަވެ އެވެ.

ވިލާތުގެ ޤައުމުތަކުގެ ތެރެއިން އެންމެ ހަލުވިކޮށް ކޯވިޑް-19 ފެތުރޭ އެއް ޤައުމަކީ އިނގިރޭސިވިލާތުގައެވެ. އެ ޤައުމުގައި މިހާތަނަށް 305،000 މީހުންނަށް ކޯވިޑް-19 ޖެހި، 46،000 މީހުންވަނީ މަރުވެފައެވެ. ބަލި ފެތުރޭ މިންވަރު އިތުރުވުމުގެ ސަބަބުން އެ ޤައުމުގެ ޞިއްޙީ ނިޒާމަށްވަނީ ބާރުބޮޑުވެފައެވެ.

އިނގިރޭސިވިލާތުގެ އަމާޒަކަށް މިހާރުވެފައިވަނީ ފިނި މޫސުން އައުމުގެ ކުރިން މުޖުތަމައުގައި ވައިރަސް ފެތުރޭ މިންވަރު މަދުކުރުމެވެ. މިލަނޑުދަނޑިއަށް ވާސިލްވުމަށްޓަކައި 5،000 މެޝިނާއެކު ޓެސްޓު ކުރާ މިންވަރު އިތުރުކުރެވޭނެއެވެ.

ފަހުގެ ލިޔުންތައް