މިއަދު ރާއްޖެއިން ކޯވިޑް-19އަށް ޕޮޒިޓިވްވެފައިވަނީ 24 މީހެކެވެ.

އެޗްޕީއޭއިން ކުރި ޓުވީޓެއްގައި ބުނެފައި ވަނީ އިއްޔެ 18:00 ން މިރޭގެ 18:00 އާއި ހަމަޔަށް އިތުރު 24 މީހަކު ޕޮޒިޓިވްވެފައިވާކަމަށެވެ. މިއާއެކު ރާއްޖެއިން ޖުމްލަ ޕޮޒިޓިވްވި މީހުންގެ އަދަދު ހުރީ 2،361 ގަ އެވެ.

މި 24 މީހުންގެ ތެރޭގައި ހިމެނެނީ 11 ދިވެހިންނާއި ބަންގަލްދޭޝްގެ ހަތް މީހުންނާއި އިންޑިއާ ހަ މީހެކެވެ.

މީގެއިތުރުން މިއަދު ވަނީ މި ބަލީގައި އިތުރު މީހަކު މަރުވެފައެވެ. މި މީހާ އާއެކު މިހާތަނަށް މަރުވި މީހުންގެ އަދަދަކީ ނުވަޔެކެވެ.

މިއަދު ނިޔާވީ ފިލިޕީންސްގެ ރައްޔިތެވެ. އުމުރުން 43 އަހަރުގެ ފިލިޕީންސް މީހާ ނިޔާވީ ދަރުމަވަންތަ ހޮސްޕިޓަލިގެ ޑީއެޗް11 ފެސިލިޓީގައި ކޮވިޑަށް ފަރުވާ ދެވެމުން ދަނިކޮށް މިއަދު 1:50 ހާ އިރުއެވެ. އެ މީހާއަކީ ރާއްޖެއިން ކޮވިޑް ޖެހުނު ހަމަ އެކަނި ފިލިޕީންސްގެ ރައްޔިތެވެ.

ކޮވިޑް ބަލިން މިއަދު ރަނގަޅުވީ 17 މީހުންނެވެ. މިހާތަނަށް ރާއްޖެއިން ރަނގަޅުވީ މީހުންގެ އަދަދު ވަނީ 1،944 އަރާފައެވެ. މިވަގުތު ފަރުވާގައި ތިބީ 403 މީހުންނެވެ.

ފާއިތުވެދިޔަ ހަފްތާއަށް ބަލާލާއިރު އެންމެ މަދުން ކޭސް ފެނިފައިވަނީ މިދިޔަ ހުކުރު ދުވަހު އެވެ. އެ ދުވަހު ފެނިފައިވަނީ ޕޮޒިޓިވް ހަ ކޭސް އެވެ.

ގުޅުންހުރި ލިޔުންތައް

ފަހުގެ ލިޔުންތައް