ފާޓިލިޓީ ސަޕޯޓް ގްރޫޕުން އިސްނަގައިގެން ދަރިމައިވުމުގެ މަރުހަލާގައި ދަތިތައް ތަހައްމަލްކުރަމުންދާ އަންހެނުންނަށް ހާއްސަކޮށް ބޭއްވި ތިންވަނަ ސެޝަން ކާމިޔާބުކަމާއެކު ނިންމާލައިފި އެވެ. މިސެޝަން ކުރިއަށް ގެންގޮސްފައިވަނީ ސޮސައިޓީ ފޯ ހެލްތު އެޑިއުކޭޝަން އާއި ގުޅިގެންނެވެ.
ފާޓިލިޓީ ސަޕޯޓު ގްރޫޕުން އިއްޔެ ކުރިއަށް ގެންދިޔަ ސެޝަން އާއި ގުޅޭގޮތުން ވާހަކަ ދައްކަވަމުން މި ގްރޫޕްގެ ފައުންޑަރ އާޝާ ހުސެއިން ވިދާޅުވީ މިއީ މިހާތަނަށް ބޭއްވުނު އެންމެ ބޮޑު ސަޕޯޓު ސެޝަން ކަމަށެވެ. އަދި މިއަދު ސެޝަން އަކީ ވަރަށް ވެސް ކާމިޔާބު ސެޝަނެއްގެ ގޮތުގައި އާޝާ ވަނީ ފާހަގަކުރައްވާފައެވެ.
ޝީ ބިލްޑިންގްގައި ކުރިއަށް ދިޔަ މި ސެޝަންތަކުގެ ފުރަތަމަ ބައި ހާއްސަކޮށްފައިވަނީ މި ސެޝަނުގެ ބައިވެރިންގެ މެދުގައި ވާހަކަދައްކާ އަދި އެމީހެއްގެ އަމިއްލަ އިހްސާސްތައް އެކަކު އަނެކަކާއި ހިއްސާކުރުމުގަ އެވެ.
އެގޮތުން މި ސެޝަންގައި ބައިވެރިވި ބައިވެރިންވަނީ ދަރިމައިވުމުގެ މަރުހަލާގައި އެމީހަކަށް ދިމާވެފައި ހުރި ދަތިތައް އެކަކު އަނެކަކަށް ހިއްސާކޮށްފަ އެވެ. މި ސެޝަންގައި ބައިވެރިވެފައިވަނީ ދަރިމައުވުމުގެ މަރުހަލާގައި ދަތިތަކާއި ކުރިމަތިވެފައިވާ އަންހެނުންގެ އިތުރުން އައިވީއެފް ހެދުމަށް ތައްޔާރުވަމުންދާ މީހުންނެވެ.
"މިއީ އަސްލު ވަރަށް ރަނގަޅުކަމެއް. ރާއްޖޭގައި މިހާރު ޕީސީއޯއެސް، އެންޑިއޯމެޓްރޯސިސް، އިންފާރޓިލިޓީ ސަފަރ ކުރާ މީހުން ވަރަށް ގިނަ. ވަރަށް ގިނަ ރައްޓެހިންވެސް އެބަތިބި އެކަން ސަފަރކުރާ. އެކަމަކު އެވާހަކަތައް ގޮއްސަ ޝެއާކުރާނެ މީހުންނެއް ނުތިބޭ. ހިތަށް އަރާނެ ކާކަށްހޭ އެޕްރޯޗްކުރާނީ؟ މީހުން ތިމަންނަ ޖަޖްކުރާނޭ! އަހަރެން އަހަރެންގެ ވާހަކަތައް ވަރަށް އިމޯޝަނަލްވެގެން އެހެންމީހުން ގާތުގަ ދެއްކީމަ ދެން ހުންނަ މީހާ ވަރަށް ޖަޖްމެންޓަލްވޭ އެބަ. އެކަމަކު މިގޮތަށް ސަޕޯޓު ގްރޫޕެއް ކުރިއަށް ގެންގޮސްގެން އޭގެތެރެއަށް ޕްރޮފެޝަނަލް ސައިޑުން މައުލޫމާތު ދޭކަމަށް ވަންޏާ އެމީހުންނަށް ދާނެ ސޭފް ޕްލޭސް އެއް އޮންނާނެ" މިއަދު ކުރިއަށް ދިޔަ ސެޝަންއަށް ފަހު ބައިވެރިޔަކު ބުނެފައި ވެއެވެ.
ދެ ގަޑިއިރަށް ކުރިއަށް ދިޔަ މި ސެޝަންގެ ދެވަނަ ބައި ފުރިހަމަކޮށްދެއްވާފައިވަނީ ރާއްޖޭގެ މަޝްހޫރު ޑައިޓީޝަން އިއާޝާ ހުސެން އެވެ. އެގޮތުން އިއާޝާވަނީ ބައިވެރިންނަށް ދަރިމައިވުމުގެ މަރުހަލާގައި ދަތިތައް ތަހައްމަލްކުރަމުންދާ އަންހެނުންނަށް ދުޅަހެޔޮ ލައިފްސްޓައިލެއް އަދި ނިއުޓްރިޝަން އާއި ގުޅޭގޮތުން މައުލޫމާތު ދެއްވާފަ އެވެ.
މިގްރޫޕްގެ ފައުންޑަރ އާޝާ އިތުރަށް ވިދާޅުވިގޮތުގައި ޕީސީއޯއެސް ތަހައްމަލްކުރާ ގިނަ މީހުންނަކީ އެމީހުންގެ އިހްސާސްތައް އެހެން މީހުންނަށް ކިޔައިދޭން ފަސްޖެހޭ މީހުންނެވެ. އެހެންކަމުން މި ސަޕޯޓް ގްރޫޕް ސެޝަން މެދުވެރިކޮށް މި އިހްސާސްތައް އެކަކު އަނެކަކާއި ހިއްސާކުރެވުމަކީ ވަރަށްވެސް ބޮޑު ކާމިޔާބީއެއްގެ ގޮތުގައި ދެކޭ ކަމަށް އާޝާ ވަނީ ވިދާޅުވެފައެވެ.
މީގެއިތުރުން ކޮންމެ މަހަކު އެއްފަހަރު ފާޓިލިޓީ ސަޕޯޓު ގްރޫޕް ސެޝަނެއް ބާއްވާނެކަމަށް އާޝާ ވަނީ ވިދާޅުވެފަ އެވެ. އަދި މުސްތަޤްބަލްގައި ފާޓިލިޓީ ސަޕޯޓު ގްރޫޕް (އެންޖީއޯ) އެއްގެގޮތަށް ރަޖިސްޓްރީ ކުރުމުގެ މަސައްކަތްވެސް ކުރަމުން އަންނަކަމަށް އާޝާ ވަނީ ވިދާޅުވެފަ އެވެ.
ފާޓިލިޓީ ސަޕޯޓު ގްރޫޕުގެ އިތުރު ސެޝަން އެއް މާރޗް މަހު ކުރިއަށް ދާނެ ކަމުގެ ޔަޤީންކަން އާޝާ ވަނީ ދެއްވާފައެވެ. މިސެޝަންގައި ބައިވެރިވުމުގެ ފުރުސަތު އެމަހު ހުޅުވާލާނެއެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (1)
08/02/2020 09:44