ރާއްޖޭގައި ކޮވިޑް-19 އަށް ޕޮޒިޓިވް ވާ މީހުންގެ އަދަދު އަނެއްކާވެސް މައްޗަށް ދާތީ، ރައްކާތެރި ފިޔަވަޅުތައް އެޅުމުގެ ގޮތުން އަމިއްލަ ހޮސްޕިޓަލް، އޭޑީކޭއިން ބައެއް ހިދުމަތްތަކަށް ބަދަލު ގެނެސް ފިޔަވަޅުތައް ހަރުދަނާކޮށްފި އެވެ.
އޭޑީކޭގެ ހައި ޑިޕެންޑެންސީ ޔުނިޓް (އެޗްޑީޔޫ)ގައި އެޑްމިޓްކޮށްގެން ފަރުވާދިން ތިން މީހަކު ޕޮޒިޓިވްވުމާ ގުޅިގެން އެ ތަން ބަންދުކޮށް، އެތަނަށް ހާއްސަ ހުރިހާ މުވައްޒަފުން ވަނީ ކަރަންޓީނުކޮށްފަ އެވެ. އެހެންވެ، މުވައްޒަފުންގެ ދަތިކަން ވެސް ފޯރާފައި އޮތް ކަމަށް އޭޑީކޭއިން ބުންޏެވެ.
އެ ހޮސްޕިޓަލުން ނެރުނު ނޫސް ބަޔާން ބުނާ ގޮތުގައި ވަގުތީ ގޮތުން އެ ހޮސްޕިޓަލުގައި އެޑްމިޓްކުރުން މިއަދުން ފެށިގެން ހުއްޓާލާފައިވާ ކަމަށެވެ. އަދި ޑޮކްޓަރަށް ދެއްކުން އޮންލައިންކޮށް "އިލެކްޓިވް ސާޖަރީ" ތައް ވެސް ވަނީ މިވަގުތަށް މަޑުޖައްސައިލާފައިވަ ކަމަށް ބަޔާނުގައި ވެއެވެ.
އެ ހޮސްޕިޓަލުން ބުނީ ބައްޔަށް ޕޮޒިޓިވް ޑޮކްޓަރާއި އެޗުޑީޔޫގެ ކޭސްތަކާ ގުޅުމެއް ނެތް ކަމަށެވެ. އޭގެ ބަދަލުގައި ޑޮކްޓަރުގެ އާއިލާގައި ކޮވިޑް ޖެހުނު މީހުން ތިބި ކަމަށް، އޭޑީކޭ އިން ބުންޏެވެ.
އޭޑީކޭއިން އެދެނީ ކޮންމެހެން ދާން ޖެހިގެން ނޫނީ ހޮސްޕިޓަލަށް ނުދިޔުމަށާއި އެފަދަ ހާލަތެއްގައި ވެސް އެކަނި ނުވަތަ އެހީތެރިއެއްގެ ގޮތުގައި އެކަކު ގެންދިޔުމަށެވެ. އަދި މާސްކް އެޅުމަށް ވެސް ހަނދާންކޮށްދިނެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)