އަލްޒެއިމަރސް ސޮސައިޓީ އޮފް މޯލްޑިވްސް (އޭ.އެސް.އެމް) އިފްތިތާޙް ކުރުމުގެ ޖަލްސާ އޮތީ އިއްޔެ ރޭ ޓްރީ ޓޮޕް ހޮސްޕިޓަލުގައެވެ.

އޭ.އެސް.އެމް އަކީ މުޙައްމަދު އަބޫބަކުރު (މަޝްހޫރު ނަމުން ނަމަ "ބާޑީ ޅަތުއްތު")ގެ އާއިލާ އަދި އެހީތެރިން ފެށި މަސައްކަތެކެވެ. މުޙައްމަދު އަބޫބަކުރަކީ އަލްޒެއިމަރސް ބަލި ނުވަތަ ހަނދާން ނެތުމުގެ ބަލި ޖެހިފައިވާ މީހެކެވެ. މީގެ ކުރިން މިބޭފުޅާ ވަނީ މޯލްޑިވްސް ނެޝަނަލް ސެކިއުރިޓީ ސަރވިސަސްއަށް އެތަކެއް އަހަރެއް ޚިދުމަތް ކޮށްދީފައެވެ.

މި ޖަލްސާގައި ވާހަކަފުޅު ދައްކަވަމުން މިނިސްޓަރ އޮފް ސްޓޭޓް ޑރ. ޝާހް އަބްދުﷲ މާހިރު ވިދާޅުވީ "އަލްޒެއިމަރސް ބަލި އަދި ޑިމެންޝިއާ އަކީ ބަލިމީހާއަށާއި އާއިލާއަށް ތަޙައްމަލް ކުރަން އުނދަގޫ ބަލިތަކެކެވެ. އަޅުގަނޑުމެން މިބަލިތައް ދެނެގަނެ ފަރުވާ ދިނުމަށް އިތުރަށް މަސައްކަތްކުރަން ޖެހެއެވެ. އާއިލާތަކާއި އެހީތެރިންނަށް އެއްބާރުލުން ދޭން ޖެހެއެވެ. ގާނޫނުތައް ހަދާ އާއިލާތަކަށް އެއްބާރުލުން ދިނުމުގެ ގޮތުން ސަރުކާރުން ދާނީ މިނިވަން މުއައްސަސާތަކާއި އެކީ މަސައްކަތް ކުރަމުންނެވެ. އަދި ހޭލުންތެރިކަން އިތުރު ކުރުމަށްޓަކައި މިމުއައްސަސާތަކަށް އަޅުގަނޑުމެން އެހީތެރިވެ ދޭނަމެވެ."

އޭ.އެސް.އެމް ގެ މަޤްސަދަކީ އަލްޒެއިމަރސް ބައްޔާއި ގުޅުންހުރި ޖިސްމާނީ އަދި ނަފްސާނީ ބަލިތަކާއި މެދު މުޖުތަމައުގައި ހޭލުންތެރިކަން އިތުރުކޮށް، އާއިލާތަކާއި ބަލިމީހުންނަށް އެއްބާރުލުންދީ، ސަރުކާރުގެ ސަމާލުކަމަށް މިބަލީގެ މުހިންމުކަން ގެނެސްދީ، ދިރާސާކޮށްގެން މިބަލި ތަޙައްމަލް ކުރަމުންދާ ފަރާތްތަކަށް ފަސޭހަތަކެއް ހޯދައިދިނުމެވެ.

މީގެއިތުރުން، އޭ.އެސް.އެމް އިން އަންނަނީ މީޑިއާގެ ޒަރިއްޔާއިންނާއި، ރާއްޖޭގެ އެކިކަންކޮޅުތަކުގައި ހޭލުންތެރިކަން ދިނުމުގެ ޕްރޮގްރާމްތަކާއި، ލެކްޗަރ ގެ ތެރެއިން އަލްޒެއިމަރސް ބަލި ޖެހިފައިވާ ފަރާތްތަކަށް ލުއެއް ހޯދައިދުނުމަށް ރާވަމުންނެވެ. އަދި ބަލިމީހުންނާއި ގުޅުވައިގެން ޚާއްސަ ހަރަކާތްތަކެއް ހިންގާ ބަލިމީހުންގެ އެހީތެރިންނަށް ތަމްރީނުދިނުގެ މަޝްރޫއުތަކެއް ހިންގުމަށް އޭ.އެސް.އެމް އިން ރާވައިފައިވެއެވެ.

އޭ.އެސް.އެމް އިން ބައިނަލްއަގްވާމީ ކޮންފެރެންސްތަކުގައި ބައިވެރިވެ ދިވެހރާއްޖެއަށް އިތުރު ކުރިއެރުންތަކެއް ހޯދައިދޭނެ ވާހަކަވެސް އެޖަމިއްޔާއިން އިއުލާނު ކުރިއެވެ. އަދި ރާއްޖޭގައި މިބަލި ޖެހިފައިވާ މީހުން ބަލަހައްޓާނެ ތަނެއް ޤާއިމުކޮށް މައުލޫމާތު ދޭ ސެންޓަރެއް ޤާއިމު ކުރުމަކީވެސް މިޖަމިއްޔާގެ މަޤްސަދެކެވެ.

ގުޅުންހުރި ލިޔުންތައް

ފަހުގެ ލިޔުންތައް