"އަބަދު ފޯނާކުޅެންޔާ ނަފްސާނީ ބައްޔެއް ޖެހިދާނެ" މިއީ އަޅުގަނޑުމެން ހަޔާތުގެ ކޮންމެވެސް ހިސާބަކުން އިވިފައިވާނޭ "ނަސޭހަތެކެވެ". ނަމަވެސް މި ބޯދާބަސް ކޮޅު އިވުން ވަރަށް އަވަހަށް ހުއްޓިދާނެއެވެ. ސަބަބަކީ ފަހުގެ ދިރާސާއަކުން ލިބިގެން ދިޔަ ހީނުކުރާ ކަހަލަ ނަތީޖާއެކެވެ.

ދިރާސާގެ ލިޔުންތެރިޔާ އަދި ޔުނިވާސިޓީ އޮފް ކެލިފޯނިއާގެ ޕްރޮފެސަރ އޮފް ސައިކޮލޮޖިކަލް ސައިންސް ވިދާޅުވާގޮތުގައި "ފޯނާއި ސޯޝަލް މީޑިއާ އަކީ ކުޑަކުދިންގެ ނަފްސާނީ ސިއްހަތަށް ހެޔޮ ނުވަތަ ނުބައި އެއްޗެއްތޯ ބޮޑެތިމީހުން ކުރަމުން އަންނަ ސުވާލު ހުއްޓޭ ދުވަސް މިއައީއެވެ. ކުރަންވީކަމަކީ އެކުދިންގެ އޮފްލައިން އަދި އޮންލައިން ހަޔާތުގައި އެކުދިންނަށް ސަޕޯރޓްކުރާނެ ގޮތްތައް ހޯދުމެވެ."

10-15 އަހަރާ ދެމެދުގެ 400 ކުދިން އެކި ސުކޫލުތަކުން ހޮވާ އެކުދިންގެ މޮބައިލް ފޯނު 2 ހަފްތާއެއް ވަންދެން ޓްރެކް ކުރެވުނެވެ.

ދިރާސާގެ އަލީގައި މިކުދިންނަށް ނަފްސާނީ ގޮތުން އަންނަ ބަދަލުތަކާ ޓެކްނޮލޮޖީގެ ވަސީލަތްތައް ބޭނުންކުރި އަދަދު ނުވަތަ ވަގުތާ ގުޅުމެއް ވާކަމަކަށް ނުފެނުނެވެ.

އެއާއި ޚިލާފަށް ކުދިންގެ މެދުގައި މިވަސީލަތް ތަކުން ހެޔޮ ފައިދާއެއް ކުރާކަމަށް ހެކި ފެނުނެވެ. އެގޮތުން މެސެޖް ކުރުން ގިނަ ކުދިން ނާއި މަދު ކުދިން ގެ ތެރެއިން ގިނައިން ކުރާކުއްޖާ އުފާވެރިކަން އިހުސާސް ކުރާކަމަށް ވަނީ ރިޕޯޓުކޮށްފައެވެ.

މި ދިރާސާއިން ސީދާ ޓެކްނޮލޮޖީގެ ބޭނުން ކުރުމުން ކުދިންގެ ނަފްސާނީ ހާލަތައް ގެއްލުމެއް ނާންނާނެއޭ ބުނެވެން ނެތްނަމަވެސް މިއީ ގިނަ މައިންބަފައިންގެ ސިކުނޑިއަށް ލިބޭނޭ ލުޔެކެވެ. ހަމަގައިމުވެސް ސްކްރީނަށް ދެވިހިފާފައި ހުރެއޭ މިބުނާކުދިންނަށް ލިބޭ ލުޔެކެވެ. މިހެން ވީނަމަވަސް މާ ގިނައިރު މިކަން ކުރާނަމަ އެހެން ގޮތްތަކުން ގެއްލުން ލިބޭކަމީ ކަށަވަރުކަމެކެވެ. މިސާލަކަށް، ޓެބްލެޓް އާއި ފޯނުގެ ސްކްރީން އިން ދޫކުރާ ނޫ އައްޔަކީ ކުޑަކުދިންގެ ލޮލަށް އުނދަގޫކުރާ ބޮލުގައި ރިއްސުމަށް މަގުފަހިވާ އައްޔެކެވެ.

ވީއިރު އެންމެރަނގަޅު ގޮތަކީ މެދުމިނެއްގައި މިކަން ކުރުމެވެ. ކޮންމެ ކަމެއްވެސް މާގިނައިން ކުރަން އުޅެފިއްޔާ ލިބޭނީ ގެއްލުމެވެ. ހުރިހާ ކަމެއް ވެސް ހެޔޮ ވަރަކަށް ސިއްހީގޮތުން ފައިދާ ލިބިލެނިވި ވަރަކަށް ކުރާނަމަ އެހެރީ ރަނގަޅަށެވެ. އެއީ ޓެކްނޮލޮޖީގެ ކުރިއެރުންތައް ކަމުގައި ވީނަމަވެސްމެއެވެ.

ގުޅުންހުރި ލިޔުންތައް

ފަހުގެ ލިޔުންތައް