ކޮރޯނާވައިރަސް ޕެންޑަމިކްގައި އާންމުތަންތަނުގައި ފޭސް މާސްކް އަޅައިގެން އުޅުމާއި ގުޅޭގޮތުން ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)އިން މީގެކުރިން ކޮށްފައިވާ އިލްތިމާސް ބަދަލުކޮށް، އާންމުތަންތަނަށް ނުކުމެއުޅޭއިރު އަބަދުވެސް ފޭސް މާސްކް އަޅައިގެން އުޅުމުން އެޖަމިއްޔާއިން އިލްތިމާސްކޮށްފި އެވެ.

ޑަބްލިޔުއެޗްއޯއިން މިފަދައިން އިލްތިމާސްކޮށްފައިވަނީ ހަމައެކަނި ގައިދުރުކަން ބަހައްޓައިގެން ކޮރޯނާވައިރަސް ފެތުރުން ނުހުއްޓުވޭނެ އިންޒާރު ދެމުންނެވެ.

އަދި އެ ޖަމިއްޔާއިން އަލަށް އާއްމުކުރި މައުލޫމާތުތަކުގައި ވަނީ ފޭސް މާސްކް އަކީ އިންފެކްޝަސް ޑްރޮޕްލެޓްސް ފެތުރުމަށް އޮތް އެންމެ ބޮޑު ހުރަސް ކަމަށް ބުނެފައެވެ. އެ ޖަމިއްޔާއިން މިހެން އިލްތިމާސްކޮށްފައި މިވަނީ ބައެއް ޤައުމުތަކުގައި އާންމު ތަންތަނަށް ނުކުމެއުޅޭއިރު ފޭސް މާސްކް އެޅުމަށް މަޖުބޫރުކޮށްފައި ވަނިކޮށެވެ.

މީގެކުރިން ޑަބްލިޔުއެޗްއޯއިން ވަނީ ދުޅަހެޔޮ މީހުން މާސްކް އަޅަން ޖެހޭނެކަމުގެ ސާބިތު ހެއްކެއް ލިބިފައިނުވާކަމަށް ބުނެފަ އެވެ.

"އާންމު ދަތުރުފަތުރުކުރާ ތަންތަނާއި ފިހާރަތަކާއި، އަދި މި ނޫނަސް މީހުން އެއްވާ ތަންތަނުގައި އިޖްތިމާއީ ގައިދުރުކަން ބެހެއްޓުމަކީ ދަތކަމަކަށްވެފައި އަދި ވައިރަސް އިތުރަށް ފެތުރުމުގެ ފުރުސަތު އޮތުމާއެކު، މިހާތަނަށް ލިބިފައިހުރި ހެކިތަކުގެ އަލީގައި، މިހާރުން ފެށިގެން ޑަބްލިޔުއެޗްއޯއިން ހުރިހާ ސަރުކާރުތަކަކަށްވެސް މި އިލްތިމާސްކުރަނީ މީހުން އާންމުތަންތަނަށް ނުކުމެއުޅޭއިރު އަބަދުވެސް ފޭސް މާސްކް އަޅައިގެން އުޅުމަށް ހިތްވަރުދީ ބާރުއެޅުވުމަށް" ފާއިތުވި ހުކުރު ދުވަހު ވާހަކަފުޅުދައްކަވަމުން ޑަބްލިޔުއެޗްއޯގެ ޑިރެކްޓަރ ޖެނެރަލް ޑރ. ޓެޑްރޮސް އަދަނޮމް ގެބްރިޔެސަސް ވިދާޅުވެފައި ވެއެވެ.

މީގެކުރިން ޑަބްލިޔުއެޗްއޯއިން އަބަދުވެސް ކޮށްފައިވާ އިލްތިމާސްގައިވަނީ ހަމައެކަނި ބަލިމީހުންނާއި އެމީހުންގެ ގާތުގައި ހަރަކާތްތެރިވާ މީހުން ފޭސް މާސްކް އެޅުމަށެވެ.

މިހާތަނަށް ދުނިޔޭގެ އެކި ހިސާބުތަކުން ވަނީ 7 މިލިޔަނަށްވުރެ ގިނަ މީހުން މި ވައިރަހަށް ޕޮޒިޓިވްވެފަ އެވެ. އަދި 400،000 އަށްވުރެ ގިނަ މީހުން ވަނީ މަރުވެފަ އެވެ.

ގުޅުންހުރި ލިޔުންތައް

ފަހުގެ ލިޔުންތައް