ރާއްޖެއިން ކޮވިޑް-19އަށް ޕޮޒިޓިވްވެފައިވާ ކުޑަކުދިންގެ އަދަދު 100އަށް އަރާފައިވާކަމަށް ކުޑަކުދިންގެ ހާއްސަ ޑޮކްޓަރު އަހުމަދު ފައިސަލް ވިދާޅުވެއްޖެ އެވެ.
މިހާތަނަށް ރާއްޖެއިން ވަނީ 1،841 މީހުން މި ވައިރަހަށް ޕޮޒިޓިވްވެފައެވެ. އަދި އޭގެތެރެއިން ހަތް މީހަކު ވަނީ މަރުވެފަ އެވެ.
ޖޫން3 🇲🇻
— Ahmed Faisal (@Faisalnaifaru) June 3, 2020
ކުޑަކުދިން 100 އަށް އަރާފި
އެހެންގައުމުތަކާ ބަލާއިރު ނިސްބަތުން ކުޑަކުދިންގެ އަދަދު ގިނަ
🏥ގައި ބާއްވަންޖެހިގެން ބޭއްވީ އަދި 2 👶،ދެ 👶ވެސް 8 މަހަށްވުރެ ކުޑަ އަދި ރޯގާގެ ޢަލާމާތެއް ނެތް، ހުން ހުރި، އެކަކު ހޮޑުލާ ބޭރަށްހިންގި، ޢާއިލާ ފައްސި، މިހާރު ރަނގަޅު
އައިޖީއެމްއެޗްގައި މަސައްކަތް ކުރައްވަމުން އަންނަ ޑރ. ފައިސަލް ވިދާޅުވީ ޕޮޒިޓިވްވި ހުރިހާ ކުދިންނަކީވެސް އާއިލީ ކްލަސްޓާގެ ތެރެއިން ޕޮޒިޓިވްވެފައިވާ ކުދިން ކަމަށެވެ. ނަމަވެސް މި ހުރިހާ ކުދިންގެ ވެސް ހާލު ރަނގަޅުކަމަށް އޭނާ ވަނީ ވިދާޅުވެފަ އެވެ.
ވައިރަހަށް ޕޮޒިޓިވްވި ކުދިންގެ ތެރެއިން މިހާތަނަށް ދެ ކުއްޖަކު ވަނީ ހޮސްޕިޓަލުގައި އެޑްމިޓްކޮށްގެން ފަރުވާދީފަ އެވެ. މި ދެކުދިންނަކީ ވެސް އުމުރުން އަށް މަހަށްވުރެ ހަނގު ދެ ކުދިން ކަމަށް ފައިސަލް ވިދާޅުވި އެވެ.
އަދި މި ދެކުދިންގެ ގައިގާ ރޯގާގެ އެއްވެސް އަލާމާތެއް ނެތްކަމަށާއި، ނަމަވެސް ހުން އައިސް ހޮޑުލާ ބޭރަށް ހިންގިކަމަށް ފައިސަލް ވަނީ ވިދާޅުވެފަ އެވެ.
ރާއްޖޭގައި ފާއިތުވި 15 ދުވަހު ވަނީ 48 ކުޑަކުދިން ކޯވިޑް-19 އަށް ޕޮޒިޓިވް ވެފައެވެ. ނިސްބަތުން ބަލާނަމަ ރާއްޖޭގައި މިބައްޔަށް ޕޮޒިޓިވްވެފައިވާ ކުޑަކުދިންގެ އަދަދު ގިނަކަމަށް ޑރ. ފައިސަލް ފާހަގަކުރެއްވިއެވެ.
ރާއްޖެއިން ކޯވިޑް-19 ޖެހުނު މީހުންގެ ތެރެއިން މިހާތަނަށް ވަނީ 608 މީހަކު ފަރުވާލިބި ބަލިން ރަނގަޅުވެފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)