ކޮރޯނާވައިރަސް ފެތުރުން ހުއްޓުވުމަށް މައުތު ވޮޝް އެހީތެރިވެދޭ ކަމުގެ އެއްވެސް ހެއްކެއް ނެތް ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފިއެވެ.
މައުތުވޮޝް ބޭނުންކުރާނަމަ އަނގައިގެ ތެރޭ ހުންނަ ވައިރަސް މަރުވާކަމަށް ދާދި ފަހުން އިނގިރޭސިވިލާތުގައި ހެދި ދިރާސާއަކުން ވަނީ ދައްކާފައެވެ. މިދިރާސާގައި ބުނާގޮތުން މައުތު ވޮޝް ބޭނުންކުރުމުން ވައިރަސްގެ ބޭރު ފަށަލައަށް ގެއްލުން ލިބެއެވެ.
"ފަންކްޝަން" ޖަރނަލްގައި ޝާއިއުކުރެވުނު މިދިރާސާއާއެކު މައުތުވޮޝް އާއި ކޮރޯނާވައިރަސްއާ ގުޅުމެއްވޭތޯ ބެލުމަށް އިތުރު ޓެސްޓުތައް ހެދުމަށް ސައިންސްވެރިން ގޮވާލިއެވެ.
ނަމަވެސް ޑަބްލިއުއެޗްއޯ އިން ބުނެފައިވަނީ، "ކޮރޯނާވައިރަސްއިން ރައްކާތެރިކޮށްދޭ އެއްޗެއްގެ ގޮތުގައި މައުތު ވޮޝް މަސައްކަތްކުރާކަމުގެ ހެއްކެއް ނެތް."
މިއާއި ގުޅިގެން އިތުރު ޓެސްޓުތައް ހަދަންޖެހޭ ކަމަށް ދިރާސާގައި ބައިވެރިވި ސައިންވެރިން އެއްބަސްވެއެވެ. އަދި މިވަގުތު ބާޒާރުގައި ލިބެން ހުރި އެއްވެސް މައުތު ވޮޝްއެއް ބޭނުން ކުރުމަށް މިޓީމަކުން ގޮވާލާފައެއް ނުވެއެވެ. އޭގެ ބަދަލުގައި ސައިންސްވެރިން ބުނަނީ މައުތު ވޮޝްގައި އެކުލެވޭ ބައެއް ކެމިކަލްތައް އިތުރަށް ޓެސްޓުކުރުމަށެވެ.
ކޯވިޑް-19 އިން ރައްކާތެރިކޮށްދޭ އެއްވެސް ވެކްސިނެއް އުފެއްދިފަކާއެއް ނެތެވެ. ނަމަވެސް ޑަބްލިއުއެޗްއޯ އިން އަންނަނީ ތަފާތު 8 ވެކްސިނެއް މޮނީޓަރ ކުރަމުންނެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)