ކަރަންޓީނުގެ 14 ދުވަހަށް ފަހުވެސް ބަލިޖެހުމުގެ ފުރުސަތު އޮންނަކަމަށް ޑރ. އަލީ ލަތީފު ވިދާޅުވެއްޖެ އެވެ.
މިއަދު ނެޝަނަލް އެމަރޖެންސީ އޮޕަރޭޝަން ސެންޓަރުގައި ޑރ. ލަތީފު ވިދާޅުވީ ކަރަންޓީނުގެ 14 ދުވަހަށް ފަހުވެސް ބަލިޖެހުމުގެ ފުރުސަތު އޮތްނަމަވެސް އެއީ ވަރަށް ހަނި ފުރުސަތެއް ކަމަށެވެ.
މިއަދު ރާއްޖެއިން ވަނީ ޖުމްލަ ނުވަ މީހަކު ވައިރަހަށް ޕޮޒިޓިވްވެފަ އެވެ. މި ނުވަ މީހުންނާއެކު ރާއްޖެއިން ޕޮޒިޓިވްވި މީހުންގެ އަދަދު ވަނީ 137ކަށް އަރާފަ އެވެ.
ޑރ. ލަތީފް ވިދާޅުވީ މާލެއަށް އެންމެ ފުރަތަމަވެސް ވައިރަސް އައިއިރުވެސް ކޮމިއުނިޓީ ސްޕްރެޑަކަށް ދާނެކަމަށް އާއްމުންނަށް އެފަރާތުން އިންޒާރު ދެއްވާފައިވާނޭ ކަމަށެވެ. ނަމަވެސް ބަލި ފެތުރުން ހީކުރިވަރަށް ވުރެ ލަސްކޮށްލެވުނު ކަމަށް ޑރ. ލަތީފް ވިދާޅުވި އެވެ.
ކޮވިޑަށް ޕޮޒިޓިވް ވާ މީހުންގެ އަދަދު ގިނަވަމުން ދާކަމަށާއި، ކޮމިއުނިޓީ ސްޕްރެޑް އޮތް ކަމަށް ވަންޏާ ޕޮޒިޓިވް ވާ މީހުންގެ އަދަދު އިތުރުވާނޭކަމަށް ޑރ. ލަތީފް ވަނީ ވިދާޅުވެފަ އެވެ. ހަމައެގޮތަށް ޓެސްޓް ހަދާލެއް ގިނަވާ ނަމަ ވެސް އެ އަދަދު ގިނަވާނެކަމަށްވެސް ޑރ. ލަތީފް ވިދާޅުވި އެވެ.
މިއަދު ރާއްޖެއިން ޕޮޒިޓިވްވި މީހުންގެ ތެރޭގައި ނަރުދޫ ބޯޓެއްގެ ކައްޕިވަނި ކޯވިޑް-19އަށް ޕޮޒިޓިވް ވެފައެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)