ރާއްޖެއިން މިއަދު ޖުމްލަ 18 މީހަކު ކޯވިޑް-19އަށް ޕޮޒިޓިވް ވެއްޖެ އެވެ. މިއާއެކު ރާއްޖެއިން މިހާތަނަށް ޕޮޒިޓިވްވި މީހުންގެ އަދަދު ވަނީ 128އަށް އަރާފަ އެވެ.

މިއަދު އެންމެ ފުރަތަމަ ކޯވިޑް-19އަށް ޕޮޒިޓިވް ވެފައިވަނީ ހަ މީހެކެވެ. ކޭސް 111-116 އެވެ. އެއީ ދެ ދިވެހިންނާއި ދެ ބަންގްލަދޭޝް ރައްޔިތުންގެ އިތުރުން އިންޑިޔާ އެކަކާއި ސްރީލަންކާގެ ކުޑަ އަންހެން ކުއްޖެކެވެ. މީގެ ތެރޭގައި އުމުރުން 60 އަހަރުން މަތީގެ ދިވެއްސެއްވެސް (ކޭސް 114) ހިމެނެއެވެ. އެހެން ކަމުން މިހާތަނަށް ރާއްޖެއިން ކޮވިޑަށް ޕޮޒިޓިވްވީ ދިވެހިންގެ ތެރޭގައި އުމުރުން ދުވަސްވީ ދެ މީހަކު ވަނީ ހިމެނިފަ އެވެ. އަދި ކޭސް 112 އަކީ 4 އަހަރުގެ އަންހެއް ކުއްޖެކެވެ.

އޭގެފަހުން އިތުރު 12 މީހަކު ކޯވިޑް-19އަށް ޕޮޒިޓިވްވީކަން އެޗްޕީއޭއިން ވަނީ ހާމަކޮށްފަ އެވެ. ފަހުން ޕޮޒިޓިވްވީ 12 މީހުންގެ ތެރޭގައި އުމުރުން 12 އަހަރުގެ ކުއްޖަކުވެސް (ކޭސް 117) ހިމެނެއެވެ. އެ ކުއްޖާގެ މަންމައާ ބައްޕަވެސް ވަނީ ބައްޔަށް ޕޮޒިޓިވްވެފައެވެ.

ނެޝަނަލް އެމަޖެންސީ އޮޕަރޭޝަން ސެންޓަރު (އެންއީއޯސީ) އިން މިރޭ ބޭއްވި  ނޫސްވެރިންގެ ބައްދަލު ވުމުގައި ޑރ. އިބްރާހިމް އަފްޒަލް ވިދާޅުވީ މިއަދު ޕޮޒިޓިވްވީ މީހުންގެ ކޮންޓެކްޓްރޭސިންގެ މަސައްކަތް ކުރަމުންދާ ކަމަށެވެ. މިއަދު ފެނުނު ކޭސްތަކުގެ ތެރެއިން އާ ކްލަސްޓާއެއްވެސް ފާހަގަ ކުރެވިފައިވާ ކަމަށްވެސް އަފްޒަލް ވިދާޅުވިއެވެ.

ކޭސް ނަންބަރު 118-128 އާއި ބެހޭގޮތުން ސަރުކާރުން އަދި އިތުރު މައުލޫމާތެއް ހިއްސާކޮށްފައެއް ނުވެއެވެ.

ރާއްޖެއިން މިހާތަނަށް 128 މީހުން ވައިރަހަށް ޕޮޒިޓިވް ވެފައިވާއިރު އޭގެތެރޭގައި ގިނަ އަދަދަކަށް ބިދޭސީން ހިމެނެއެވެ.

އެހެންނަމަވެސް މިރޭ ބޭއްވި ނޫސްވެރިންގެ ބައްދަލުވުމުގައި އެންއީއޯސީގެ ތަރުޖަމާނު މުހައްމަދު މަބްރޫކު އަޒީޒު ވަނީ ރާއްޖެއިން ފެނުނު ކޭސްތަކުގެ ތެރެއިން ކޭސް 17 އާއި ކޭސް 19 ބަލިން ރަނގަޅުވެ މިހާރު ދޫކޮށްލާފައިވާ ކަމަށް ވިދާޅުވެފަ އެވެ.

ގުޅުންހުރި ލިޔުންތައް

ފަހުގެ ލިޔުންތައް