ކޮވިޑް-19 އިން ރަނގަޅުވުމަށްފަހު ދެވަނަ ފަހަރަށް ޕޮޒިޓިވްވާ މީހުންގެ ފަރާތުން އެހެން މީހުންނަށް ބަލިފެތުރުމުގެ ފުރުސަތު ކުޑަކަމަށް ސައުތު ކޮރެއާގެ ސިއްހީ އިދާރާތަކުން ބުނެފިއެވެ.

އެގައުމުގައި ބައްޔަށް ޕޮޒިޓިވްވާ މީހުންގެ އަދަދު ދަށަށް ގޮސްފައިވީ ނަމަވެސް ސައުތު ކޮރެއާގެ ސެންޓަރސް ފޯ ޑިޒީޒް ކޮންޓްރޯލް އެންޑް ޕްރިވެންޝަން (ކޭސީޑީސީ) އިން ވަނީ ދެވަނަ ފަހަރަށް ބައްޔަށް ޕޮޒިޓިވްވާ މީހުންގެ އަދަދު އިތުރުވެއްޖެ ކަމަށް ބުނެފައެވެ.

މިހާތަނަށް ސައުތު ކޮރެއާގައި މިކަހަލަ 180 އަށް ވުރެ ގިނަ ކޭސް ރިޕޯޓުކުރެވިފައިވެއެވެ. ނަމަވެސް މީގެން އެއްވެސް މީހެއްގެ ފަރާތުން އެހެން މީހަކަށް ބަލިފެތުރުނު ކަމަކަށް ހޯދިފައެއް ނުވެއެވެ.

ކޮރެއާގެ ސިއްހީ އިދާރާތަކުން އަދިވެސް ދަނީ ދެވަނަ ފަހަރަށް މީހުން ޕޮޒިޓިވްވާ ސަބަބު ދެނެގަތުމަށްޓަކައި ދިރާސާތައް ކުރަމުންނެވެ.

ސައުތު ކޮރެއާގައި ފާއިތުވި 24 ގަޑިއިރު ތެރޭ ދެނެގަނެވިފައިވަނީ ކޮވިޑް-19 ގެ 8 ކޭސް އެވެ. މިހާތަނަށް އެގައުމުގައި 10،702 މީހުން ބައްޔަށް ޕޮޒިޓިވް ވެފައިވާއިރު ބަލީގެ ސަބަބުން މަރުވެފައިވަނީ 240 މީހުންނެވެ.

ކޮވިޑް-19 ޗައިނާގައި ފެތުރެން ފެށި ދުވަސްވަރު ދެން އެންމެ ބޮޑަށް ބަލީގެ އަސަރުކުރި އެއް ގައުމަކީ ސައުތު ކޮރެއާ އެވެ. ނަމަވެސް މިހާރު އެގައުމުން ވަނީ ވައިރަސް ފެތުރުން ކޮންޓްރޯލް ކޮށްފައެވެ. މިކާމިޔާބީގެ ފަހަތުގައި ވަނީ ގިނަ އަދަދަކަށް ޓެސްޓުކުމާއި ފުޅާކޮށް ކޮންޓެކްޓް ޓްރޭސިންގް ގެ މަސައްކަތް ކުރުން ކަމަށް މާހިރުން ވިދާޅުވެއެވެ.

ގުޅުންހުރި ލިޔުންތައް

ފަހުގެ ލިޔުންތައް