ކޮވިޑް-19 ގެ ނުރައްކާ އަދިވެސް އޮތީ ކުރިއަށް ކަމަށް ޑަބްލިއުއެޗްއޯގެ ޑިރެކްޓަރ ޖެނެރަލް ޑރ. ޓެޑްރޮސް އަދަނޮމް ގެބްރެޔެސުސް ވިދާޅުވެއްޖެއެވެ. 

"ގަބޫލު ކުރައްވާ. އެންމެ ނުރައްކާތެރި ދުވަސްތައް އަދިވެސް އޮތީ ކުރިއަށް. މިކަންތައް ހުއްޓުވުމުގެ ގޮތުން މަސައްކަތް ކުރަމާ ހިނގާ. މިވައިރަސް މަސައްކަތްކުރާ ގޮތް އަދިވެސް ގިނަބަޔަކަށް ދަސްވެފައެއް ނުވޭ." ޑރ. ޓެޑްރޮސް ހޯމަ ދުވަހު ވިދާޅުވިއެވެ.

މިހެން މިގޮތަށް ޑރ. ޓެޑްރޮސް ވިދާޅުވެފައިވަނީ ބައެއް ގައުމުތަކުން އަޅާފައިވާ ފިޔަވަޅުތައް ލުއިކުރަން ފަށާފައިވާ ދަނޑިވަޅެއްގައެވެ. އޭގެ ތެރޭގައި އޭޝިޔާ އަދި ޔޫރަޕްގެ ގައުމުތައް ހިމެނެއެވެ. 

ނަމަވެސް ޑރ. ޓެޑްރޮސް މިގޮތަށް ގަބޫލުކުރައްވަނީ ކީއްވެގެންތޯ ތަފްސީލް އެއް ނުކޮށް ދެއްވައެވެ. މީގެ ކުރިން ޑަބްލިއުއެޗްއޯއިން ވަނީ އެފްރިކާގައި މިވައިރަސް ފެތުރެން ގާތްކަމަށް ވިދާޅުވެފައެވެ. މިގައުމުތަކުގެ ސިއްހީ ނިޒާމްތައް ކުރިއަރާފައިނުވާކަން ގިނަ ބަޔަކު ފާހަގަ ކުރެއެވެ.

މީގެ އިތުރުން ޑރ. ޓެޑްރޮސް ވަނީ 1918 ގައި ދުނިޔޭގައި ފެތުރުނު ސްޕެނިޝް ފްލޫއާ މިހާރު ފެތުރެމުންދާ ކޮރޯނާވައިރަސް އާ އެއްގޮތް ކުރައްވާފައެވެ. ނަމަވެސް މިހާރު ޓެކްނޮލޮޖީ ކުރި އަރައިގެން ގޮސްފައިވުމުން މިފަދަ ބަލިމަޑުކަމެއް ހުއްޓުވޭނެކަންވެސް ޑރ. ޓެޑްރޮސް ވިދާޅުވިއެވެ.

މިހާތަނަށް 2.5 މިލިއަނަށް ވުރެ ގިނަ މީހުންވަނީ ކޮވިޑް-19 އަށް ޕޮޒިޓިވް ވެފައެވެ. މީގެ ތެރެއިން 178،000 މީހުންވަނީ ބަލީގެ ސަބަބުން މަރުވެފައެވެ.

ގުޅުންހުރި ލިޔުންތައް

ފަހުގެ ލިޔުންތައް