މާލޭގައި ބާރު ސްޕީޑެއްގައި ކޮރޯނާވައިރަސް ފެތުރެމުންދާތީވެ، މި ދުވަސްވަރު އެއްވެސް ޒަރޫރީ ބޭނުމެއްގައި ނަމަވެސް ގެއިން ބޭރަށް ނުކުންނަ ނަމަ، މާސްކް އެޅުމަށް ޑރ. ލަތީފް އިލްތިމާސް ކުރައްވައިފި އެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ޑރ. ލަތީފް ވަނީ މިހާރު އޮންނަ ޤަވާއިދާއި އެއްގޮތަށް ތަންތަނަށް ދާނަމަ މާސްކް އެޅުމަކީ ވަރަށް މުހިއްމު ކަމެއްގެ ގޮތުގައި ފާހަގަކުރައްވާފަ އެވެ. އެއީ ފިހާރައަކަށް ވިޔަސް އަދި އެހެން ތަނަކަށް ދިޔަ ކަމުގައި ވިނަމަވެސް އެކަށީގެންވާ މާސްކެއް އަޅައިގެން ނޫނީ ބޭރަށް ނުދިއުމަށް ޑރ. ލަތީފްވަނީ އިރުޝާދު ދެއްވާފަ އެވެ.
މިއަދު އެކަނިވެސް މާލެއިންވަނީ 15 މީހަކު ކޯވިޑް-19އަށް ޕޮޒިޓިވް ވެފައެެވެ. އަދި ރާއްޖެއިން ވައިރަހަށް ޕޮޒިޓިވްވި މީހުންގެ އަދަދުވަނީ 67އަށް އަރާފަ އެވެ.
ޑރ. ލަތީފް ވިދާޅުވީ މިދުވަސްވަރު ގޭގައި މަޑުކުރުން އެންމެ މުހިންމު އެއް ސަބަބަކީ ތިމާއަށް ނޭގި ގެއަށް ބަލިވެއްދޭ މީހަކަށް ތިމާ ވެދާނެތީ ކަމަށެވެ. އަދި ހާއްސަކޮށް ބޯޓުތައް ދޮށަށް މުދާ ބާލުވަން ދާ ހިނދު ދިވެހިންނާއި ބޭރުމީހުންނާއި ތަފާތުކޮށް މުދާ ބޭލުވުމުގައި ބޭރުމީހުން އުޅުމަށް ދެކޮޅު ހަދަމުންދާކަން ފާހަގަވެފައި ވާކަމަށް ޑރ. ލަތީފް ވަނީ ވިދާޅުވެފައެވެ.
އެހެންނަމަވެސް މިފަދަ ތަންތަނުގައިވެސް ބޭރު މީހުންގެވެސް ހުން ބަރާބަރަށް ޗެކް ކުރާކަމަށާއި، އަދި މިފަދައިން އަމަލުކުރާނަމަ ރަށްރަށަަށް އެތެރކުރަންޖެހޭ މުދަލާއި ބޭސް ފަދަ ތަކެތި އެތެރެކުރުމަށް ދަތިވާނޭ ކަމަށް ޑރ. ލަތީފް ވަނީ ވިދާޅުވެފަ އެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)