މާލެ، ހުޅުމާލެ އަދި ވިލާމާލޭގައި ވެކްސިން ދިނުމުގެ ހިދުމަތް ވަގުތީ ގޮތުން މެދުކަނޑާލެވިފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިއުލާނުކޮށްފިއެވެ.
މިކަމާ ގުޅިގެން އެޗްޕީއޭ އިން ނެރުނު އިއުލާނުގައި ބުނެފައިވަނީ މިގޮތަށް އަމަލުކުރަން ނިންމާފައިވަނީ މިދުވަސްވަރު ފެތުރެމުންދާ ކޮވިޑް-19 ގެ ސަބަބުން މާލޭގައި ބަލިމީހުން ފެންނާތީ ކަަމަށެވެ. އަދި މިބަލި ހަލުވިކަމާއެކު ފެތުރޭ މިހާލަތުގައި ވެކްސިން ދޭ މަރުކަޒުތަކަށް ދިޔުމަށްވުރެ އާއްމުން ގޭގައި މަޑުކުރުން ރައްކާތެރިކަމަށް ބެލެވޭތީކަމަށް އެޗްޕީއޭ ބުނެފައިވެއެވެ.
ވެކްސިން ދިނުން މެދުކަނޑާލައިފައިވަނީ މިވަގުތު އިއުލާނުކޮށްފައިވާ 14 ދުވަހުގެ ލޮކްޑައުން މުއްދަތުގެ ނިޔަލަށެވެ.
ނަމަވެސް ލޮކްޑައުންގެ މުއްދަތު ނިމުމުން މިހާލަތު މިއަށްވުރެ ދިގުދެމިގެން ދާނަމަ މާލެ ސަރަހައްދުގައި ވެކްސިން ދިނުން ކުރިއަށް ގެންދިއުމަށް ހަމަޖެހިފައިވާ ގޮތް އިއުލާނުކުރާނެ ކަމަށް އެޗްޕީއޭ އިން ބުނެފައިވެއެވެ.
މިހާތަނަށް ރާއްޖޭއިން 67 މީހަކު ވަނީ ކޮވިޑް-19 އަށް ޕޮޒިޓިވް ވެފައެވެ. އޭގެ ތެރެއިން 47 މީހުން ޕޮޒިޓިވް ވެފައިވަނީ މާލެ އިންނެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)