މާލެ ސަރަހައްދުން ކޮވިޑް-19 އަށް ތިން މީހަކު ޕޮޒިޓިވް ވުމާއި ގުޅިގެން އެންމެންވެސް ގޭގައި ތިބުމަށް އެންގި މާލެ ސަރަހައްދު ވަނީ ލޮކްޑައުން ކުރެވިފައެވެ.

މިހާލަތުގައި ކަމާބެހޭ ފަރާތްތަކުން ކުރާ އެންމެ މުހިންމު ކަމަކީ ކޮންޓެކްޓް ޓްރޭސިންގް ގެ މަސައްކަތެވެ. އެއީ ބައްޔަށް ޕޮޒިޓިވްވެފައިވާ މީހުންނާ ކޮންޓެކްޓް ވެފައިވާ މީހުން ހޯދާ އެމީހުން ތިން ބަޔަކަށް ބަހާލުމެވެ. ހައި-ރިސްކް، މީޑިއަމް-ރިސްކް އަދި ލޯ-ރިސްކް އެވެ. 

މީގެ ތެރެއިން ހައި-ރިސްކް އަދި މީޑިއަމް-ރިސްކް ކޮންޓެކްޓުން ބެހެއްޓޭނީ ކަރަންޓީން ފެސިލިޓީ ތަކުގައެވެ. ބަލި ނެތްކަން ޔަގީން ކުރުމުގެ ގޮތުންނެވެ.

މިއަދު ހަވީރު ދަރުބާރުގޭގައި ބޭއްވުނު ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް އޮފީހުގެ ތަރުޖަމާން މަބްރޫކް އަޒީޒް ވިދާޅުވެފައިވަނީ މާލެ އިން ޕޮޒިޓިވް ވި ތިން ކޭސްއާއި ގުޅިގެން 200 އަށް ވުރެ ގިނަ މީހުން ކޮންޓެކްޓްސްގެ ގޮތުގައި ދެނެގަނެވިފައިވާ ކަމަށެވެ.

މުސްތަޤްބަލުގައި އެހެން މީހަކު ޕޮޒިޓިވް ވެއްޖެނަމަވެސް އެންމެ މުހިންމު ކަމަށްވާނީ އެމީހެއްގެ ކޮންޓެކްޓް ޓްރޭސިންގް ގެ މަސައްކަތެވެ.

އެގޮތުން ކަމާބެހޭ ފަރާތްތަކުން މިކުރާ ކަންތަކަށް ފަސޭހަކޮށްދިނުމުގެ ގޮތުން ކޮންމެ މީހަކުވެސް ފާއިތުވި 14 ދުވަހު ބައްދަލުވެފައިވާ މީހުންނާއި، ހޭދަ ކުރި ވަގުތު، ދިޔަ ތަންތަނާއި ދިޔަ ވަގުތު ތަކުގެ ލިސްޓެއް އެކުލަވާލުމަށް މަބްރޫކް ގޮވާލެއްވިއެވެ.

"މިގޮތަށް ތިބޭފުޅުންގެ އަމިއްލަ ތަފްސީލް ފަހަތަށް 14 ދުވަހަށް ވާވަރަށް ލިޔުއްވާފަ ހުންނަ ކަމަށްވާނަމަ ވަރަށް ފަސޭހަވާނެ ކޮންޓެކްޓް ޓްރޭސިންގް ގެ މަސައްކަތް ކުރައްވާ ބޭފުޅުންނަށް އެ މަސައްކަތް ކުރަން."

މަބްރޫކްގެ އިތުރުން ހަމުގެ ބަލިތަކަށް ހާސަ ޑޮކްޓަރ، ޑރ. މުހައްމަދު ހައިކަލް ވެސް ވަނީ އާއްމުންގެ ފަރާތުން މިކަންތައް ކުރުމަށް އެދިލައްވާފައެވެ.

While we are at lockdown it maybe be useful if everyone think and jot down people we met and places we have been to in the past two weeks. #COVID19Maldives #ContactTracing

— Hykal (@MHykal) April 16, 2020

މާލެ ސަރަހައްދުން ކޮވިޑް-19 އަށް ޕޮޒިޓިވް ވި ތިން ކޭސް ފެނުމާއެކު "ކޮމިއުނިޓީ ސްޕްރެޑް" ރާއްޖޭގައި އޮތުމުގެ ބިރުވެރިކަންވެސް ވަނީ އުފެދިފައެވެ. 

ކޮމިއުނިޓީ ސްޕްރެޑްގެ މާނައަކީ ސީދާ ކޮވިޑް ކޭސް އަކާ އެއްވެސް ގުޅުމެއް ނެތް ޕޭޝަންޓެއް ކޮވިޑް އަށް ޕޮޒިޓިވް ވުމެވެ. އަދި މިކަން ވިޔަނުދިނުމަށްޓަކައި މީގެ ކުރިން ރާއްޖޭގެ ސަރުކާރުން ވަނީ ހަރުކަށި ފިޔަވަޅުތަކެއް އަޅާފައެވެ.

މިވަގުތު މާލެ ސިޓީ މިއޮތީ ލެވަލް ރަތު ގައެވެ. ކޮންމެހެން މަސައްކަތް ކުރަންޖެހޭ އޮފީސްތައް ނޫން އެހެނިހެން އޮފީސްތައް ބަންދުކުރެވި، މީހުންނަށް ގެއިން ބޭރަށް ނުކުތުން މަނާކޮށް، ޒަރޫރޫ ބޭނުމަކަށް ނޫނީ ދަތުރު ފަތުރު ކުރުންވެސް ވަނީ މަނާކުރެވިފައެވެ.

ކޮވިޑް-19 ގެ އަސަރުކޮށްފައިވާ ކޮންމެ ގައުމަކުންވެސް އެންމެ އިސްކަމެއް ދީގެން ކުރަނީ ކޮންޓެކްޓް ޓްރޭސިންގް ގެ މަސައްކަތެވެ. އެއީ ބަލި ފެތުރުން ކޮންޓްރޯލް ކުރުމުގައި ބޮޑު ދައުރެއް އަދާ ކުރާނެ ކަމަކަށް ވާތީއެވެ. 

ތިމާ ބައްދަލުވެފައި ހުރި މީހަކު މިބައްޔަށް ޕޮޒިޓިވް ވުން އެކަށީގެންވެއެވެ. އެފަދަ ދަނޑިވަޅެއްގައި އެކުލަވާލާފައިވާ މިލިސްޓުގެ ބޭނުން ޖެހޭނެއެވެ.

ގުޅުންހުރި ލިޔުންތައް

ފަހުގެ ލިޔުންތައް