ރާއްޖޭގެ ފަސް ސަރަހައްދެއްގައި ކޯވިޑް-19އަށް ފަރުވާދެވޭނެ އިންތިޒާމް ހަމަޖެއްސުމަށް ސަރުކާރުން ނިންމާފައިވާ ކަމަށް ކޯވިޑް-19ގެ ތަރުޖަމާނު މަބްރޫކް އަޒީޒް ވިދާޅުވެއްޖެ އެވެ.

އޭގެތެރޭގައި އައްޑޫ/ހިތަދޫ ރީޖަނަލް ހޮސްޕިޓަލްގައި 23 އައިސީޔޫ އެނދުގެ އިތުރުން 22 އައިސޮލޭޝަން އެނދު ހެދުމަށް ނިންމާފައިވާ ކަމަށް މަބްރޫކް ވަނީ ވިދާޅުވެފައެވެ. އަދި ގއ. އަތޮޅު ހޮސްޕިޓަލުގައި 23 އައިސީޔޫ އެނދު އަދި 12 އައިސޮލޭޝަން އެނދު ހެދުމަށް ވެސް ވަނީ ނިންމާފަ އެވެ.

ހަމައެހެންމެ މަބްރޫކް ވިދާޅުވީ މި ދެ އަތޮޅުގެ އިތުރުން ލ. ގަން ރީޖަނަލް ހޮސްޕިޓަލުގައި 20 އައިސީޔޫ އެނދާއި 23 އައިސޮލޭޝަން އެނދު، ބ. ރީޖަނަލް ހޮސްޕިޓަލްގައި 20 އައިސީޔޫ އެނދާއި 37 އައިސޮލޭޝަން އެނދު އަދި ށ. އަތޮޅު ހޮސްޕިޓަލްގަ 20 އައިސީޔޫ އެނދު އަދި 37 އައިސޮލޭޝަންގެ އެނދު ހެދުމަށް ނިންމާފައިވާ ކަމަށެވެ.

މީގެތެރެއިން ބައެއް ހޮސްޕިޓަލްތަކަކީ މިހާރުވެސް ބޭނުންކުރެވެމުން އަންނަ ހޮސްޕިޓަލްތަކަކަށް ވުމުން، އެ ހޮސްޕިޓަލްތަކުގައި ވަކި ދޮރަކުން ވަދެ ނުކުމެވޭގޮތަށް މިކަމަށް ހާއްސަކޮށް ވަކި ސަރަހައްދެއް ކަނޑައެޅުމަށް ނިންމާފައިވާ ކަމަށެވެ.

އެހެންކަމުން އާއްމުގޮތެއްގައި ސިއްހީ ހިދުމަތް ހޯދަން އަންނަ މީހުން ވަކި ދޮރަކުން ވަދެ ނުކުމެ ހެދުމަށް، އަދި ކޯވިޑް-19އަށް ފަރުވާދޭ ޑޮކްޓަރުންނާއި ނަރުހުންނާއި އަދި ބައްޔަށް ޝައްކުކުރެވޭ މީހުން ވަނުމަށް ވަކި ދޮރެއްގެ އިންތިޒާމް ހަމަޖެހޭނެ ކަމަށެވެ.

މަބްރޫކް ވިދާޅުވީ ސަރުކާރުގެ އަމާޒަކީ މި ހުރިހާ ތަންތަނަކީވެސް ކޯވިޑް-19އަށް ޓެސްޓްކުރެވޭނެ ތަންތަނަށް ހެދުން ކަމަށެވެ. 

އެގޮތުން މި ހޮސްޕިޓަލްތަކުގައި މިހާރުވެސް ޓީބީއަށް ޓެސްޓްކުރާ ޖީއެންއެކްސްޕާޓް މެޝިންތަކެއް ހުންނާނެ ކަމަށާއި، އެ މެޝިންތަކަށް ލައްވާ ވަކި ހާއްސަ ކާޓްރީޖެއް ކޯވިޑް-19އަށް ޓެސްޓްކުރުމަށް މިހާރު އީޖާދުކޮށްފައިވާ ކަމަށް މަބްރޫކް ވަނީ ވިދާޅުވެފަ އެވެ.

އެހެންކަމުން މިހާރު ކުރެވެމުންދަނީ އެ އެއްޗެހި ރާއްޖެއަށް ގެނައުމުގެ މަސައްކަތްކަމަށް މަބްރޫކް ވަނީ ވިދާޅުވެފަ އެވެ.

ރާއްޖެއިން މިހާތަނަށް ވަނީ 20 މީހަކު ކޯވިޑް-19އަށް ޕޮޒިޓިވްވެފަ އެވެ. އޭގެތެރެއިން 14 މީހެއް ވަނީ ބަލިން ރަނގަޅުވެފަ އެވެ.

ގުޅުންހުރި ލިޔުންތައް

ފަހުގެ ލިޔުންތައް