ކޯވިޑް-19 އާއި ގުޅިގެން ރާއްޖޭގައި މަސައްކަތްކުރާ ސިއްހީ އެހީތެރިންނަށް އެހީތެރިވުމަށްޓަކައި އެކ ޤައުމުތަކުގައި ތިބި ދިވެހި 70އަށްވުރެ ގިނަ ސިއްހީ އެހީތެރިން ރާއްޖެ އަތުވެއްޖެ ކަމަށް ސަރުކާރުން ބުނެފިއެވެ.
ކޯވިޑް-19ގެ އެންމެ ފަހުގެ މައުލޫމާތު ދިނުމަށްޓަކައި މިރޭ ކުރިއަށްދިޔަ ނޫސްވެރިންގެ ބައްދަލުވުމުގައި ހެލްތް މިނިސްޓަރ އަބްދުﷲ އަމީން ވިދާޅުވީ ރާއްޖެއިން ބޭރަށް ސިއްހީ ދާއިރާއިން ތައުލީމާއި މަތީ ތައުލީމު ހާސިލްކުރަން ގޮސްތިބި ފަރާތްތަކުގެ ތެރެއިން މިހާތަނަށް 70އަށްވުރެ ގިނަ ފަރާތްތައް ރާއްޖެ އައިސްފައިވާ ކަމަށެވެ. އަދި އޭގެތެރެއިން ގިނަ ބަޔަކު ކަރަންޓީނު ފުރިހަމަކޮށްފައިވާ ކަމަށް އަމީންވަނި ވިދާޅުވެފަ އެވެ.
މިނިސްޓަރ ވިދާޅުވީ އަދިވެސް ރާއްޖެއަށް އަންނަން ބޭނުންވާ ގިނަ ސިއްހީ އެހީތެރިންތަކެއް ގިނަ ޤައުމުތަކެއްގައި ތާށިވެފައި ތިބި ކަމަށެވެ. އަދި އެމީހުން ގެނައުމުގެ މަސައްކަތް ސަރުކާރުން ކުރަމުން އަންނަކަމަށް އަމީން ވަނީ ވިދާޅުވެފަ އެވެ.
ހަމައެހެންމެ ރާއްޖެއަށް ބަލިފެތުރޭ ހާލަތެއްގައި އެންމެ ބޮޑަށް ބޭނުންވާނީ ސިއްހީ އެހީތެރިންކަމަށް މިނިސްޓަރ ވަނީ ވިދާޅުވެފައެވެ.
ތިބާގެ ޚިޔާލު
މި ލިޔުމަށް ލިބިފައިވާ ކިޔުންތެރިންގެ ޚިޔާލު (0)