ކޯވިޑް-19 ހުއްޓުވި އާންމު ހާލަތަކަށް ރުޖޫޢަވެވޭނީ، ސިއްހީ އެހީތެރިން ދެމުންދާ އިރުޝާދުތަކަށް އެންމެންވެސް އަމަލުކޮށްގެން ކަމަށް ޑރ. ނަޒްލާ ރަފީޤު ވިދާޅުވެއްޖެއެވެ.

ނެޝަނަލް އެމަރޖެންސީ އޮޕަރޭޝަން ސެންޓަރުގައި މިރޭ ކުރިއަށްދިޔަ ނޫސްވެރިންގެ ބައްދަލުވުމުގައި ޑރ. ނަޒްލާ ވަނީ ކޯވިޑް-19 އިން ރައްކާތެރިވުމަށް ސިއްހީ މާހިރުން ދެމުންދާ އިރުޝާދުތަކަށް އަދިވެސް ބައެއް މީހުން އަމަލުކުރަމުން ނުދާކަން ފާހަގަ ކުރައްވާފަ އެވެ.

އެގޮތުން ޑރ. ނަޒްލާ ވިދާޅުވީ އިޖުތިމާއީ ގައިދުރުކަން ބެހެއްޓޭނެގޮތަށް ގިނަ ތަންތަނުގައި އިންތިޒާމްކޮށްފައި ހުރި ނަމަވެސް، އަދިވެސް ބައެއް މީހުން އެ އިރުޝާދުތަކަށް އަމަލު ނުކުރާށެވެ.

"އެއްކޮށް ޖަހާފައި ހުންނަ ގޮނޑިތަކުގައި ވަކިވަކިން ގޮނޑިދުރުކޮށް، ގޮނޑީގައި ނުއިށީނުމަށް އެދި އެއްޗެއް ތަތްކޮށްފައި ހުންނަ ގޮނޑިތަކުގައިވެސް ބައެއް މީހުން އިށީންދެގެން އެބަތިބި."

ޑރ. ނަޒްލާ ވިދާޅުވީ އެބޭފުޅުން މިހާރު މަސައްކަތް ކުރައްވަމުންދަނީ ގިނަ ކަންކަމެއް ހުޓުވައި އަދި ގިނަ ބަޔަކަށް އެކަމުން ދަތިވާނޭ ގޮތަށް ކަމަށެވެ. އެހެންނަމަވެސް މި އިރުޝާދުތަކަށް އެއްބަޔަކު އަމަލު ކުރިނަމަވެސް، އެންމެން އަމަލުނުކުރާނަމަ އެކަމުގެ ނަތީޖާ ނުފެންނާނޭ ކަމަށް ޑރ. ނަޒްލާ ވަނީ ވިދާޅުވެފަ އެވެ.

ހަމައެހެންމެ، ގައިދުރުކަން ބެހެއްޓުމާއި، އަދި ގިނަގިނައިން އަތްދޮވުމަކީ ކޯވިޑް-19ގެ އިތުރުން ކުރިއަށް އޮތްތަނުގައި އިންފުލުއެންޒާ ފަދަ ބަލިތަކުން ރައްކާތެރިކޮށްދޭނޭ ކަމެއްގެ ގޮތުގައި ޑރ. ނަޒްލާ ވަނީ ފާހަގަކުރައްވާފަ އެވެ.

ރާއްޖެއިން މިހާތަނަށް ވަނީ 19 މީހަކު ކޮރޯނާވައިރަހަށް ޕޮޒިޓިވްވެފަ އެވެ. އޭގެތެރޭގައި 4 ދިވެހިން ހިމެނޭއިރު، މި ހަތަރު މީހުން ފިޔަވައި އެންމެން ވަނީ ބަލިން ރަނގަޅުވެފައެވެ.

ގުޅުންހުރި ލިޔުންތައް

ފަހުގެ ލިޔުންތައް